Guwahati, Rymphang 28: Kum shi bynta ban dang pyniar shuh shuh ha kaba iadei bad ki kam pynroi, ka Sorkar Assam ha ka sngi Thohdieng kala ïasoi ïa ka jingïateh kular bad ki bor pynïaid ka Airports Authority of India (AAI) ban pynlong ïa ki jingpule bniah shwa ban pyntreikam ïa ki 5 tylli ki kad liengsuiñ ba la tyrwa ha kylleng ka jylla.
Ia kane ka MoU la iasoi da u Commissioner bad Secretary ka tnad Transport, u Akashdeep na ka bynta ka sorkar jylla, katba u Chairman ka AAI u Vipin Kumar ula mihkhmat ia ka bor pyniaid liengsuin ha ka jingiadon lang u Myntri Rangbah ka Assam u Himanta Biswa Sarma.
Ia ki kad liengsuin ba la tyrwa ban shna ia ki jaka jyrngam la thmu ha Manas National Park, Umrangshu (Umrangso), Majuli, Diphu bad Charaideo — ki jaka ba la jied na ka bynta ka jinglong ba kongsan jongki, ka kam jngohkai pyrthei bad ka jinglah ban pyniasoh ia ki thain.
Haba kren ha kane ka sngi, u Myntri Rangbah ka Jylla u Sarma ula ong, ba ki kad liengsuiñ ba jyrngam ha Manas National Park kan kyntiew shibun ïa ka kam jngohkai pyrthei khamtam eh ia ka Wildlife Tourism ha ka thaiñ sepngi jongka Assam.
Ula bynrap ba ki kad liengsuiñ ha Majuli, Umrangshu, Diphu bad Charaideo kin kyntiew ïa ka jingïadei ha ki thaiñ, kin pynsuk ïa ka jingpoi sha ki distrik kiba jngai bad kiba don sha ki jaka ba kyndong bad kin pynkiew ïa ka jingwan ki nongwan jngohkai pyrthei — kaba kyntiew ia ka roi ka par bad ka kamai kajih ha ka thaiñ.
U Myntri Rangbah ula ong, ba ka jingpynroi ïa kine ki kad liengsuiñ ba jyrngam kan ailad ïa ka Assam ba kan long kum ka nuksa ia kiwei pat ki jylla ha kaba pynïar ïa ki lynti ïaid liengsuiñ.
U Sarma ula kyntu ruh ïa ka AAI ban pyrkhat ban kyntiew ïa ka kad liengsuiñ jong ka Rupsi sha ka kad liengsuiñ kaba pura, da kaba kdew ïa ka jingjan jong ka bad ka Siliguri Corridor, kaba la ju tip kum ka Chicken’s Neck.
Nalor kata, ula kyrpad ïa ka jingïadei ban dang pynbha shuh shuh ha kaba iadei bad ka kaba Lokpriya Gopinath Bordoloi, da kaba pynksan ïa ka jingdonkam kaba nangroi jong ka Assam kum ka khyrdop ban rung sha ka thaiñ shatei lam mihngi jong ka Southeast Asia.
“Ki kad liengsuiñ kiba jyrngam bad ka jingsdang ïa ki liengsuiñ na kine ki jaka la khmih lynti ba kan ai ka jingkyrshan kaba khraw ïa ka jingïadei ha ki thaiñ, ban kyntiew ïa ka kam jngohkai pyrthei, ka karkhana bad ka khaïi pateng bad ban pynkhlain ïa ki lad jingïadei ba kongsan ha kylleng ka jylla,” u la ong.
U la bynrap ba kane ka jingthmu kan pynskhem ïa ka bynta jong ka Assam kum ka khyrdop ba kongsan sha ka thaiñ shatei lam mihngi jong ka ri India bad ki ri ba marjan jong ka thaiñ South bad ka Southeast Asia.
Napdeng kiba la iadonlang ha kane ka jingiasoi MoU ki kynthup ia u MLA u Dharmeswar Konwar, u CEM jong ka Karbi Anglong Autonomous Council u Tuliram Ronghang, u CEM jong ka NC Hills Autonomous Council u Debolal Gorlosa, u Chief Secretary u Ravi Kota, u Secretary ka tnat Civil Aviation jong ka Sorkar India u Samir Kumar Sinha ryngkat ki heh ophisar na ka Sorkar Jylla bad Sorkar Pdeng.
 ban pynlong ïa ki jingpule bniah shwa ban pyntreikam ïa ki 5 tylli ki kad liengsuiñ ba la tyrwa ha kylleng ka jylla.){kind=link}