Agartala, Jymmang 03 : Ka Sorkar Tripura kala iasoi ia ka Memorandum of Understanding (MoU) haduh phra tylli bad ki Nongkynshew kam bad ki nongseng karkhana na kylleng ki bynta jong ka Ri, ban kyntiew ia ka kam pynmih jri, siej, ka rep ka riang bad ia ki lad ai jingsumar ha ka koit ka khiah hapoh ka Jylla, kiba kot haduh T. 312.38 klur.
Ia kine ki MoU la iasoi hadien ka jingialang State Level Investment kaba la iashimbynta da u Myntri Rangbah ka Jylla Manik Saha, ki Heh Ophisar ka Sorkar Pdeng bad Sorkar Jylla, ki Nongkynshew kam bad Nongseng Karkhana kiba wan na kylleng ki jaka hapoh ka Ri.
Kine ki Nongkynshew kam kila iasoi ia ka MoU bad ka Sorkar Tripura ban seng ia ki karkhana jri, plywood, mechanical agarbati rolling, medical and skill education, BPO, warehouse, agro bad milk processing lem bad kiwei kiwei.
Kine ki jingwan seng kam kin pynkha ia ka lad aikam iajam ia bun phew spah ngut ki nongshongshnong.
U Myntri Rangbah ka Jylla hadien ka jingialang, ula pyntip ba ha kane ka jingialang ba shisngi jong ki Nongkynshew kam, oalat 140 ngut ki nongkynshew kam bad nongseng karkahan na kylleng ki bynta ka Ri kila wan ban iashimbynta.
U Manik Saha ula ong ba ka Sorkar kan sa ai ia ka Investment subsidy, ka procurement subsidy ba 15%, Industrial promotion subsidy, power subsidy, ka jingpynphai pat ia shiteng ka sut na ka jingshim ram, employment cost subsidy, export promotion subsidy, state promotion subsidy bad kiwei kiwei khnang ba kan khring ia ki karkhana bad kiwei ki kam ha Tripura.
