Shillong, Naitung 25 : Ka Sorkar Meghalaya ha ka sngi Thohdieng, kala iasoi ia 13 tylli ki Memorandum of Understanding (MoU) bad ki Technical bad Research Institute, ban pynkupbor ia ki nongshongshnong ki thain Nongkyndong ba kin lah sengkam thymmai kat kum ka buit treikam ba ki don.
Ia kine ki MoU la iasoi ha ka Summit for Rural Empowerment kaba long ha State Convention Centre, Shillong.
Kine ki jingiatreilang ba kongsan-hapoh ka Pradhan Mantri Janjatiya Vikas Mission (PMJVM)-ki thmu ban pynkylla ia ka roi ka par ki jaka nongkyndong da kaba wanrah ia ki technology, ka jingpynmih iaki mar ba thymmai, bad ban pynioh ia ka iew ha kylleng ka Ri.
Ki Heh Sorkar kila pynthikna ba sa hynriew tylli ki MoU kila don mynta ha ka jingpynkhreh, ki ban nang pynkhlain shuh shuh ha ka jingkyntiew ia ka ioh ka kot ki jaka nongkyndong.
Kine ki sienjam ki phaikhmat eh ha ka jingpynkylla ia ki mar ba pynmih na ki shnong nongkyndong sha ki mar kiba heh dor, ki mar ki bym don jingktah satia ia ka mariang.
Ki kam kiban leh ki kynthup ia ka jingpynkylla ia ki jaboh ba mih na u sohtrun bad ka kait (snep) sha ka sboh ban rep ban riang bad ki jingsong ia ki mar ki mata, ban sain ia ki syntiew sha ki kynbat rong sniuh bad gulal, ban shim ia ki umphniang na ki dieng ba long dawai, bad ban pynmih ia ki jingbam na ki marrep kum na u kew, phan karo bad phandieng.
Ka Myntri kam Rep kong Ampareen Lyngdoh kala khot ia ka PMJVM, “ka jingkylla ba iohi jngai kaba la sei ia u soh mynta” bad ong ba ki flagship program kum ka CM Farm Plus scheme bad ka State Organic Farming Mission-kaba la pyntrei mynta ha ka jaka ba 52,000 hectare bad ka thong ban kyntiew sha ka 1 lak hectare ha u snem 2028-ka long kaba kongsan bha ban pynkhie im ia ki jaka nongkyndong ka jylla Meghalaya.
Ka Myntri kala pynpaw ruh ba haduh 169 Vikas Divyangta Vikas Kendras (VDVK) la dep ban mang, kaba ai jingmyntoi ia palat 50,000 ngut ki briew. Man ki VDVK ki kyrshan ia 15 tylli ki kynhun Self Help Group-60% ki riewlum-bad tyrwa T.15 lak kum ka jingiarap song pisa ban thied ia ki tiar ki tar ba donkam, ban ai jinghikai bad ba kyrshan ia ka kam song iaki mar ki mata.
U Dr Vijay Kumar D jong ka Meghalaya Basin Management Agency (MBMA) ula ong ba ki MoU kin iarap ban pynkylla ia ki VDVK sha ki Viavle Rural Enterprise da kaba pyniasoh ia ki bad ki Institution kiba don ia ka kyrdan ha ka Ri. Ula ong ba ia kine ki soskular la tei halor ka nongrim bala buh da ka PRIME Programme (2018) ka Jylla, bad ka PMJVM kaba la iaid kat kum ka jingpyrshang jong ka MSRLS, FOCUS, Cooperatives nad Producer Group.
Ula pynkynmaw ruh ia ka jingiaroh jong ka Myntri Pla Tyngka ka Ri Nirmala Sitharaman ia ka Meghalaya kaba long kum ka nuksa ia ka Ri India kaba sngewskhem bad kaba shaniah halade.
U Myntri Rangbah ka Jylla Conrad K Sangma, haba kren ha ka jingialang, ula ong ba ka Summit ka pyni ia ka jingktah jong ka Sorkar ia ki Nongrep, ki kynhun ki Kynthei bad ki imlang sahlang ha nongkyndong. Ula pyntip ba kumba 55,000 tylli ki Self Help Group bad don palat 5 lak ngut ki kynthei, la dep ban thaw ha kine ki hynniew snem bad haduh 2 lak ngut ki nongrep bad 20,000 tylli ki kynhun nongrep kila ioh ia ka jingkyrshan na ka Sorkar.
Haba kren halor ki jingeh kum ka jingslem ban ioh ia ki symbai, u Conrad ula kdew ba ka CM Farm Plus Scheme kan wanrah ia ka jingkylla. Ula pynpaw ruh ba lyngba ka CM Assure Programme, ka Sorkar kala pynlut haduh T.50 klur tang ha ki phra bnai bala leit noh ban tehlakam ia ka dor ka mur ki marrep kum u synsar bad u kwai.
 bad ki Technical bad Research Institute, ban pynkupbor ia ki nongshongshnong ki thain Nongkyndong ba kin lah sengkam thymmai kat kum ka buit treikam ba ki don.){kind=link}