Shillong, Nailur 28: U Symbud Lamphang ka iing dorbar thawain ka jylla u Timothy D Shira bad u Commissioner & Secretary, Meghalaya Legislative Assembly u Dr. Andrew Simons, kila leit iashimbynta ha ka 21st Annual Conference jongka Commonwealth Parliamentary Conference, India Region, Zone III ha Aizawl, Mizoram ha ka 27 bad 28 tarik u Nailur.
Ïa kane ka Conference la plie paidbah da u Lamphang jongka Lok Sabha u Om Birla uba long ruh u Chairman jong ka Commonwealth Parliamentary Association, India Region.
Ki phang ba la iakren bad iatai ha kane ka Conference ki long ka jingkynthup ïa ka thaiñ shatei lammihngi ha ka India-ASEAN Visionfor Trade and Cooperation bad ban pyniasoh bad ka Ministry of Doner bad ka NEC na ka bynta ka jingthmu ban don ia ki plan kiba biang bad ka jingiatreilang na ka bynta ki projek bapher ha ka thain.
U Timothy D Shira, ula ïashimbynta ha kitei ki jingiatai halor baroh ar tylli ki mat bad ula ai ia ki jingmut kiba kongsan halor ka jingïaid lynti jong ka thaiñ khamtam na ka bynta ka lawei ka jongka.
Katba u Dr. Andrew Simons, ula ai ia ka jingbatai kaba bniah halor ka kaiphod da kaba phaikhmat sha ki kam bad ki jingseisoh jongka CPA Region Zone III naduh ka jingialang kaba la dep.
Na ka liang u Harivansh Narayan Singh, Deputy Chairman ka Rajya Sabha, u Sharingain Longkumer uba long u Lamphang jongka Nagaland Assembly bad u Chairman ka India Region Zone – III, u Lalbiakzama u Lamphang jongka Mizoram Assembly, u Lalduhoma u Myntri Rangbah ka Mizoram ryngkat bad ki Lamphang bad Symbud Lamphang na ka thain shatei lammihngi bad katto katne ki Member of Parliament (MP) bad Member of Legislative Assemblies (MLA) kila iashimbynta lang ha katei ha Conference.
