Shillong, Nohprah 18 : U Myntri Rangbah Duh ka Jylla Narendra Modi hynne ka sngi U Blei ula iashimbynta ha ka jingrakhe dap 50 snem jong ka North Eastern Council (NEC) bad plie pyrda ia u maw nongrim jong kiba bun tylli ki project ha Nongbah Shillong.
U Myntri kam Pohiing ka Ri Amit Shah bad ki Myntri Rangbah lem bad ki Lat jong ki phra tylli ki Jylla ka thain Shatei Lam Mihngi kila wan iashimbynta lang ha kane ka jingrakhe jubili ksiar jong ka NEC, ka Tnad Planning bala seng ha u snem 1972 ban plan bad pyntreikam ia ki project ha ki Jylla ka Thain Shatei Lam Mihngi.
Ha ka jingialang bala pynlong ha madan Jawaharlal Nehru Stadium (madan polo) Shillong, u Myntri Rangbah ula buh ia u mawnongrim jong kiba bun tylli ki project kiba shongdor haduh T. 2450 klur.
Na Shillong, u Myntri Rangbah Duh un leit sa sha Jylla Tripura ha kaba un sa ai jingkren sha ki paidbah ha madan Swami Vivekananda mynta hi ka sngi u Blei bad un plie ia ki katto katne ki project bad buh mawnongrim ia ki katto katne kiba shongdor haduh T. 4350 klur.
Ia u Myntri Rangbah Duh ka Ri la leit pdiang sngewbha da u Myntri Rangbah ka Jylla Conrad K Sangma lem bad u Chief Secretary ka Jylla. U G.Kishan Reddy Myntri ka DoNER ula wan ryngkat bad u Myntri Rangbah Duh ban iashimbynta lang ha kane ka jingrakhe ka NEC.
U Myntri ka Tnad Information & Cultural Affairs ka Tripura Sushanta Choudhury ula pyntip ba u Myntri Rangbah un sa pyllait paidbah ruh ia ka “Grih Pravesh” Programme na ka bynta ki nongioh ia ka skhim Pradhan Mantri Awas Yojana (baroh kiba ha sor bad nongkyndong).
