Shillong Naiwieng 24: U Myntri Khynnah ka Sorkar Pdeng uba khmih ia ka tnat Micro, Small and Medium Enterprises, u Bhanu Pratap Singh Verma hynne ka sngi Thohdieng ula iashimbynta ha ka Viksit Bharat Sankalp Yatra kaba la long ha ka shnong Tynring kaba hap hapoh ka Mawryngkneng Block, East Khasi Hills District.
U Myntri Khynnah ula ong, ba ka Viksit Bharat Sankalp Yatra, ka dei ka campaign ha kylleng ka ri ban ai jingtip khnang ban pyntreikam pura ia ki skhim ka Sorkar India ha baroh ki jaka rilum, ki jaka nongkyndong bad ki jaka sor bad ka thong jong ka Yatra kaba long ban ai jingtip ia ki bynta ka imlang sahlang kiba shem jingeh kiba dei ban ioh bynta ha ki skhim bapher bapher hynrei ki bym pat ioh jingmyntoi na kine ki skhim.
Ula ong ba u Myntri Rangbah Duh ka ri u Narendra Modi u niewkor bha ia ka roi ka par kaba pura ha ka thain shatei lammihngi jong ka ri bad ula pynthikna ba ki briew na kane ka thain ki ioh kham bun ki jingmyntoi na baroh ki skhim Sorkar. Ki jylla ka thain ki la ioh mad ia ka roi ka par kaba sted ha kine ki khyndai snem ba la dep, haba ka Sorkar kala peit bniah ia ka jingkyntiew ia ki lad ka leit ka wan bad ki jingdon jingem.
U Myntri ula sam ia ki certificate sha ki khyndai ngut kiba la ioh jingmyntoi na ka Pradhan Mantri Awas Yojana Gramin bad ula ong ba ka jingpyntreikam ia ka PMAY-G – ka skhim pynioh iing ia baroh, kala pynurlong ia ki jingangnud jong kiba duk ba suk ba kin don ia la ka jong ka iing.
Hapoh ka jingialam jong u Myntri Rangbah Duh, ka India ka la kiewshaphrang ha baroh ki kam bad mynta ka don ha ka kyrdan kaba 5 ha ka ioh ka kot ha kane ka pyrthei, la ong u Verma da kaba bynrap ba shen ka ri kan sa kylla sha ka ri kaba don ha ka kyrdan kaba lai ha ka ioh ka kot.
U Myntri ula ong ba la sdang ia ka Viksit Bharat Sankalp Yatra da kaba shim ia ka rukom treikam kaba pura ha ka jingiadon bynta ki tnad Sorkar India bad ki Sorkar Jylla ban pynthikna ia ka jingiashim bynta jong baroh na ka bynta ka bha ka miat jong ki briew jong ka ri bad khnang ban pynurlong ia ka thong jong ka jingioh ia ka ri kaba la kiew shaphrang.
Ula kyntu ia ki nongmihkhmat, ki ophisar bad kiwei kiwei ba kin iashimbynta ha ka Viksit Bharat Sankalp Yatra ban ai jingtip ia ki paidbah bad ban pynshlur ia ki ba kin leit shim ia ki jingmyntoi kaba ki dei ban ioh.
Katba u Myntri ka tnad Animal Husbandry and Veterinary ka sorkar jylla u Bah Alexander Laloo Hek ula ong ba ka Sorkar Pdeng kala wanrah shibun ki sienjam kiba thymmai na ka bynta ka roi ka par jong ka jylla bad ka ri baroh kawei.
Ula kyntu ia ki paidbah ba kin shim ia ki jingmyntoi na ki prokram bad ki skhim jong ka Sorkar khamtam haba ka Sorkar Pdeng hapoh ka jingialam jong u Myntri Rangbah Duh, u Narendra Modi ka dang ialeh katba lah ban pynthikna ba kan ym don kano kano ka thaiñ ha ka ri kaban sahdien.
