Shillong, Naitung 19 : U Myntri Rangbah ka Jylla Conrad K Sangma ha ka sngi Palei, ula leit iashimbynta ha ka jingialang paidbah jong ka CM-Connect, ka prokram ban iakren iakhana marmet bad ki paidbah, kaba la pynlong ha madan phutbol Kurkalong, Lumdaitkhla, Bhoirymbong.
Kane ka dei ka rynsan iakynduh paidbah kaba ar bala pynlong, ha kaba ki paidbah napoh ka Block kila wan ban iashimbynta ban pynsngew iala ki jingeh ba ki iakynduh.
Ki paidbah kila pynsngew hakhmat u CM ia ki jingeh ba kynthup naduh ka jingsniew ki surok, ka jingbym biang ha ka pule ka dangle, ka umbam umdih, ka bording elektrik, ka rep ka riang bad kiwei kiwei.
Haba ai jingkren, u Myntri Rangbah ula ong “Ka CM-Conect Programme ka don ia ki kyrdan bapherbapher hynrei ka jingthmu hi ka long ban wanrah shajan ia ka synshar khadar sha u paidbah bad ban sngap dalade ia ka jingeh ki paidbah”.
“Kam dei ia ka Sorkar ban shna ia ki prokram, ki skhim bad Policy da kaba shong na Ophis hynrei ban pynbeit ia ki kat kum ka jingdonkam u paidbah. Ngi la wan ban sngap ia ki jingeh jong phi bad tip ia kaei kaba treikam bad kaei ka bym treikam. Kane ka dei ka rynsan kaba paka bha namar ngi don ia ki nongmihkhmat na baroh ki Tnad Sorkar ban ai ia ka jubab bad ngi lah ruh ban pynkhreh ia ki lad ki lynti ban pynbeit ia kiei kiei baroh” ula ong.
Ki paidbah kiba la wan iashimbynta, kila pynpaw ia la ki jingsngewkhia bad ki jingeh ba ki iakynduh ha ki Tnad bapher bapher kumka Jal Jeevan Mission (JJM), ka pule dangle, ka jingsniew palat ka surok VIP road bad khamtam ei halor ka jingai jingkyrshan ia ki briew kiba don jingduna ha ki dkhot met.
U Myntri Rangbah bad ki Heh Ophisar jong ki Tnad bapher bapher kila ai jubab bad pynshai ia ki jingkylli bad jingsngew khia jong u paidbah. U Myntri Rangbah ula kular ruh ia baroh ba ka Sorkar kan sa khmih bniah bha ia kine ki jingpynsngew jong ki.
Ha kane ka sngi, u Myntri Rangbah ula sam ruh ia ki Cheque sha ki Community Based Organisation (CBO), CLF, VO hapoh ka NRLM Community Investment Fund (CIF) sha ka Kynthupiang Cluster Level Federation, Kyrdem bala mang sha ki 31 tylli ki SHG.
Ula aiti ruh ia ki CIF sha ki 36 tylli ki VO na ka bynta ki 129 tylli ki SHG lem bad ka Vulnerability Reduction Fund ia ki 8 tylli ki VO.
Nalor kine, ula sam ruh ia ki 11 tylli ki Bolero Pickup sha ki nongioh bynta jong ka CM Elevate.
