Shillong Naiwieng 26: U Myntri Rangbah ka Jylla Conrad K. Sangma, ha ka sngi Baar, ula leit iashimbynta ha ka Attestation Parade jong ka Batch kaba Hynriew jong ki Agniveers ha Assam Regimental Centre, Happy Valley.
Kane ka prorkam ka dei kaba la pynlong ban ai jingithuh bad jingpdiang ia ki samla kiba la pyntbit ialade ha ka kam shipai kaba 31 taiew bakin long noh ki shipai jongka Ri.
Kila don baroh 783 ngut kiba la ioh jinghikai kiba pyntbit kaba kynthup ia ki 274 ngut ki Agniveer bad 509 ngut ki Territorial Army kiba la sdang ia ka jingioh jinghikai naduh ka 1 tarik u Jymmang 2025.
Kine ki Agniveer ki kynthup ruh ia 8 ngut ki Naga/Kuki, 2 ngut ki Mizo/Lushai, 20 ngut ki Assamese/Kachari, 18 ngut ki Arunachali bad kiwei kiwei kiba na kylleng ki bynta jong ka thain shatei lammihngi ki don haduh 226 ngut.
U Myntri Rangbah ula leit ban khmih bniah ia ka Parade, kaba kynthup ia ka march-past, ka jingai ia ki khusnam bad ka jingpyntian smai, ha kaba la wan ban sakhi ruh da ki kmie ki kpa jongki samla kiba la shah jied kila wan ban sakhi lang ia ka ‘Gaurav Padak’ kum shi bynta jong ka jingai jingithuh ia ka jingnoh synniang ka jongki sha ka ri.
Haba ai jingkren, u Myntri Rangbah ula iaroh ia ka jingdonnam jongka Assam Regiment kaba la seng ha Shillong ha ka 15 tarik u Jylliew 1941 bad kaba la iakhun da ka jingshlur pyrshah ia ki nong Japan ha ka Thma Bah ka Baar, kaba la leh ia ka bynta kaba kongsan tam ban iada ia ka ri.
“Ka long kaei kaei kaba sngewsarong ba mynta ka sngi, hadien ka jingpyndep da ka jingseisoh ia ka jingioh jinghikai pyntbit, phi lah long mynta ki bynta jong ka Assam Regiment bad ki shipai jong ka ri India” la ong u Conrad.
Ula pynshai halor ka jingkitkhlieh kaba nangne shakhmat bad ong, “Ba kine ki shipai kiba dang shu rung thymmai ha ka kam kin ai ka jingshakri ha ki jaka lum kiba ka jinglong jingman ka suinbneng kan long kaba eh bad ha ki thain kiba don ha kyndon eh jong ka khappud” bad ula kyntu ia ki ba kin bat skhem ia ka matpdeng jong ka Assam Regiment ka “Asam Vikram”.
Ula pynkynmaw ruh ia ki nongrim kiba kongsan jong ki shipai kaba kynthup ia ka “Kamram, jinglen lade, jinglong ryntih ha ka rukom trei ia ka kam bad ka jingieid ri, kiba long ka nongrim kiba shisha jong u shipai”.
U Myntri Rangbah ula pynpaw ia ka jingsngewnguh ia ki bahaiing bahasem kiba la donlang bad pynpaw ia ka jingskhem jingmut ba kine kiba la rung thymmai ha ka kam shipai kidei kiba lah pynkhreh ban iakhun ia kino kino ki jingtynjuh kiban wan nangne shakhmat.
Ula kubur ruh ia ka jingtrei met bad mynsiem jong ki nonghikai ha kaban saindur ia kine ki nongioh jinghikai bad ula ai khublei ruh ia kine ki samla kiba la rung thymmai ha ka kam shipai bad ia ki bahaiing bahasem ki jongki.
La pynkut ia kane ka prokram da ka jingiaid da ka Slow March, ka jingrwai ia ki jingrwai ki Army bad ka jingrwai jong ka Regiment bad ka jingrwai ia ka jingrwai ka Ri ne National Anthem bad ka jingiashondur lang bad kine ki samla kiba dang shu rung thymmai ha ka kam shipai.
Kala don ruh ka jingpyni ia ka jingleh ia ka PT bad ka jingiakren bad ki kmie ki kpa jong kine ki samla kiba la rung ha ka kam shipai, hashwa ba u Myntri Rangbah un mih noh na katei ka jaka.
