Shillong, Risaw 17 : U Vice President ka National Rifle Association of India (NRAI) Bah John F Kharshiing bad kiwei kiwei kila iashimbynta ha ka jingialang iasyllok ia ka Draft National Sports Governance Bill, 2024, kaba la pynlong da ka tnad Ministry of Youth Affairs and Sports, jongka Sorkar Pdeng hynne ka sngi Palei ha New Delhi.
U Bah John ula pyntip ba ha katei ka jingialang la ioh ban pynsngew ba ka long kaba donkam ia katei ka Bill ban ithuh ia ki State Olympic Association kaba long kum ka shatri ia kiba bun ki kynhun ialehkai Olympic hapoh jylla.
La pynsngew ruh ha ka jingiakren bad u Dr Mansukh Mandaviya, u Myntri ka jongka tnad Youth Affairs and Sports, ka sorkar India ba kam long kaba suk ban pyntreikam ia ki aiñ ha man ki District kumjuh ha kaba iadei khamtam bad ka jingialehkai ia siat namar tang ki Shooting Range ruh kim don bad kumta ka lah ban ktah kylla ia ki jingialehkai.
Kajuh ka sur la mih na ka kynhun Gymnastics, Golf kiba la pynpaw ka jingeh namar ka jingbym biang ki jaka ia lehkai ha ki District kumta ka jingkyrpad kala long ban kyntu ia ka sorkar India ban pyrkhat bha kumno ban leh haba kum kine ki jingeh ki don.
U Bah John F Kharshiing, u la pynpaw ruh ba katei ka Bill kadei ban don ka jingbatai shaphang ki State Olympic kiba long ki tnad ka IOA hapoh ki jylla namar khamtam baroh kiba ioh leit sha ka National Games ki hap ban thep kyrteng lyngba ka State Olympic Association bad ki long kiba iatrei jan bad ki sorkar jylla ha kaba kyntiew ia ka Sports ha ki jylla.
Ka Dr P.T Usha, President jongka IOA ruh kala pynsngew ba ka long kaba donkam ban pynpaw shai ia ka hok jong ki State Olympic bad kala pynpaw ia ka jingdonkam ban ioh ia ka Bill kaba mynjur da ka International Olympic Committee.
Kiwei kiwei ki nongkren kiba bun kidei na ki National Sports Federation kila pynpaw ia la ki jingai jingmut bad ia katei ka jingiasyllok la pyniaid da u Dr Mansukh Mandaviya, ha ka jingiadon lang ki ophisar ka tnad Sports.
U Myntri u la pynpaw ia ka jingdonkam ia katei ka Bill ban pynbeit ia ki jingklumar ki mukotduma, ha kiba bun ki kynhun ia lehkai ka Ri India bad ula ai jingmut ba la donkam ruh ban wad ki rukom kiba kham pyhlla kumno ban wad ia ki sap (talent Identification) ki samla khnang ban ioh ia kiba kynsai bad ban pyrkhat hangno ban buh iaki lada lap ia kum kita ki samla, kum shi bynta ban ioh pynkhreh ia ka Ri india na ka bynta ka thong ban pynlong ia ka Olympics ha u snem 2036 hapoh ri India.
 Bah John F Kharshiing bad kiwei kiwei kila iashimbynta ha ka jingialang iasyllok ia ka Draft National Sports Governance Bill, 2024, kaba la pynlong da ka tnad Ministry of Youth Affairs and Sports, jongka Sorkar Pdeng hynne ka sngi Palei ha New Delhi.){kind=link}