Nongstoiñ, K’lyngkot 22: Haduh 54 ngut ki Khynnah na ki skul bapher bapher ba kynthup bad kynthei bad shynrang, kila iashimbynta shitrhem ha ka prokram wad nongsiat suloi ba donsap hapoh ka District kaba la pynlong da ka Shooting Association ka West Khasi Hills (SAWKH) ha ka sngi Palei.
Kane ka prokram ‘Talent Search cum Coaching and Awareness Programme’ ba arsngi ka SAWKH ka dei kaba la ithuh bad ioh jingkyrshan na ka Shooting Association of Meghalaya ryngkat ka Directorate of Sports & Youth Affairs ka Jylla, ka dei kaba la pynlong kum shibynta na ka jingpynkhreh ia ka National Games 2027 ban long ha Jylla.
Ia kane ka prokram la pynong ha Mount Hermon Academy Secondary School New Nongstoin, ha kaba ki la don kumba 54 ngut ei ei ki samla pule kynthei bad shynrang na ki skul bapher bapher jong ka sor Nongstoin, kila wan ban pynrung kyrteng ialade bad shah hikai ha ki nongialehkai siat suloi kiba dei ruh ki nonghikai kiba la paw jong ka Shooting Association of Meghalaya.
Hashwa ka prokram ban ai jinghikai, la ioh ban pynlong ia ka jingialang kaba lyngkot ha phyllaw jong ka skul, kaba la pyniaid da u Bah Despitol Sun President ka SAWKH ha ryngkat ka jingdonlang u Rev B.Thongni kum u symbud kongsan, u Bah Edilbert Lyndem RO Planning Officer kum u kongsan.
Haba ai jingkren u Rev B.Thongni u la pynpaw ba ha man la ki jingialehkai ka don beit ka jingiadei ha ka jingim jong u briew, kata ka dei ka jinglong ba ngi don ia ka thong bad kaba ar pat ka dei ba ka pynlong ia ngi ba ngin don ia ka jinglong ryntih. Kumta ha ka kam iasiat pistol bad suloi ruh ka long hi kajuh ba ngi hap ban don ia ka thong lane ka target, da kaba ngi dei ban long kiba pynleit jingmut skhem bad ban im ka jingim kaba beit bad kaba ryntih.
U Bah Edilbert Lyndem haba kren kum u kongsan u la ong ba ka jingwan kane ka sports hapoh ka District, ka long ka khubor kaba kmen na ka bynta ki samla kyrpang eh iaki ba ioh ia ka lad ban sei ia ka sap ka phong kaba ki don.
U la ong ruh ba haduh 95% kane ka jingialehkai ka dei beit ba pyndonkam da ka bor jabieng. Ngi donkam ban pyndonkam hok ia ka sap khnang ba ha kawei ka sngi ngin sa poi sha ka thong da kaba ngin pynleit jingmut ha kata ka sap ba ngi don.
 ha ka sngi Palei.){kind=link}