Shillong, Naiwieng 03: Kam don satia kano kano ka kam ka bym lah ban leh lada don ia ka jingangnud bad ka jingtrei shitom… ia katei ka nuksa la pyni da kawei ka khynnah kynthei kaba na Tura kaba la leit ban iashimbynta ha kawei na ki Marathon kaba la rim tam ha ka pyrthei, ka New York City Marathon ha United States.
Kane ka samla Garo ka dei ka Doramontie Rangsa Nelleman kaba la iashimbynta ha ka New York Marathon, ka jingiakob mareh kaba pawnam ha kylleng ka pyrthei.
Kumba ju long man la ka snem, mynta u snem ruh kila don da ki phew hajar ngut ki nongmareh kiba la wan iashimbynta bad kane ka jingmareh kala sdang na Staten Island hynne ka sngi u Blei.
Ia ka New York Marathon, la pynlong nyngkong eh ha u snem 1970 bad kala nang paw katba dang iaid ki snem bad kadei kawei na ki jingiakob mareh kaba don bun tam ki khusnam ia ki nongjop. Ka New York City Marathon ka dei ruh kaba la bna da ka jingiatreilang bad bun tylli ki kynhun trei mon sngewbha kiba pynbiang ia ka jainphong jong ki nongmareh.
Ka khusnam na ka bynta ki nongjop ha ka New York Road Runners ka long $100,000 kata (₹8,200,000) sha ki nongjop ha ka kyrdan jong ki kynthei bad shynrang, kiba wan baar ki ioh $60,000 kata (₹4,920,000).
Ki 6 ngut ki nongjop kiba wan shakhmat ki ioh lut baroh da ka song tyngka.
Ha kane ka jingiakob kaba mynta u snem, kila don palat 50,000 ngut ki nongmareh kiba la iashimbynta ha ka jingiakob kynthup ia ki katto katne ngut ki khlur ne ki riewpawnam.
U Nev Schulman, u Producer bad u nongpyniaid ia ka MTV’s “Catfish,” ula iashimbynta ha ka sien kaba phra ha ka NYC Marathon.
U Randall Park, ia kaba la tip kum ka ABC’s “Fresh Off the Boat,” ruh ula iashimbynta, katba u Greg Rikaart, uba ak ha ka “Days of Our Lives” bad “The Young and the Restless,” ula iashimbynta lang ha katei ka jingiakob.
