Shillong, Nohprah 01: Palat 200 ngut ki khynnah skul na West Jaintia Hills kila wan shim bynta haka Winter Camp kaba lai sngi iaka bala ai kyrteng “Spectrum of Life” bad kaba la pynlong halor ka phang pdeng “The future is yours”.
Ia kane ka program la pynlong daka ophis jong ka District Planning Officer, West Jaintia Hills bad ka District Jowai haka jingiatrelang bad kiwei ki kynhun trei mon sngewbha.
Haduh 5 ngut naki 40 tylli ki skul na sor bad khap sor jong ka West Jaintia Hills kila wan shim bynta.
Ia kane ka Winter Camp la pynlong hapoh ka North East Adventist University, Khliehtyrchi, West Jaintia Hills naduh 29 tarik Naiwieng haduh 1 tarik Nohprah 2023.
Ha kane ka sngi la don lang u MLA ka Jowai u Bah Wailad Shylla bad ula kyntu iai khynnah skul ban trei shitom naka bynta ban poi shaka thong.
Kiwei kiba kren ha kane ka sngi ki kynthup u Bah Silvester Phanbuh MCS, FB Basan, DPO bad u Bah B Blah ADC bad Election Officer jong ka West Jaintia Hills District.
Ha ka sngi plie iaka Winter Camp, la lamkhmat da u Bah H.H.Mohrmen bad ka Niwanka Shylla jong ka Society for Urban and Rural Empowerment (SURE), Jowai.
Ha kane ka Winter Camp ba lai sngi, ki khynnah kila ioh ruh ban leit kai NEAU sha Thadlaskein bad haka jingiaid kjat kila lum ruh iaki jaboh na ki surok bad ka wah.
U Bah H.H Mohrmen ula iathuh khana halor ka Sajar Nangli bad ka khana shaphang Thadlaskein.
Haka por mynstep, kala don ruh ka jingshad Zumba bad Yoga ba lam khmat da ka Bharat Scouts and Guides halor ki rukom pyndonkam iaki rynsan Social Media bad kumno ban tehlakam iaka jingshah leh bein.
Nalor kane u Bah Mohrmen ula ai jingkren ruh halor ka jingkylla ka suin bneng.
U Bah Daniel L. Gatphoh na Jowai u badei ruh u nongshongdur ula iathuh khana halor ka lynti ba u iaid ban long briew man briew ha kane ka kam daka ba pyndonkam hok iaka rynsan Social Media.
Ha kine lai sngi, ki khynnah kila sakhi ruh iaka kynhun ‘Chi iung’ bad iaka Kong Simi Kongthiang ka nong shnna Film, ka samla Irene Dkhar Miss Meghalaya bad Miss North East, Ehok Dkhar, Eugene Lyngdoh u nongialhekai Footballer ba paw nam ka Ri India.
