Shillong Nohprah 17: Ka Shillong District Unit jong ka BJP hynne ka sngi Saitjaiñ ka la pynlong iaka Bike Rally kaba la tip kum ka ‘Rally for Development’ ha kaba palat 600 ngut ki nongniah thuk thuk kila wan ban iashimbynta.
La sdang iaka rally da ka jingkaweh lama u President ka BJP Meghalaya u Bah Ernest Mawrie ryngkat ka jingdonlang u MLA ka BJP u Bah Sanbor Shullai bad kine ki nongniah thuk thuk kila mih na Madan Fire Brigade bad nangne kila leit ha kylleng ki bynta jong ka nongbah Shillong bad la pynkut pat ia katei ka Rally hakhmat ka ophis treikam jong ka BJP.
Ha ka jingkaweh lama ia katei ka rally u Bah Mawrie ula ong, ba katei ka rally kadei ka jingrakhe iaki kam ba bha kiba la urlong ha Meghalaya lyngba jong u Myntri Rangbahduh ka ri u Narendra Modi uba la theh ia ki skhim bad ki projek ki bapher bapher.
Ha ka jingpynkut ia katei ka rally, na ka liang u MLA ka BJP u Bah A.L. Hek ula ai khublei ia ki nongkitkam bad ki dkhot ka BJP kiba la iashimbynta ha katei ka rally ban rah ia ka lama jong ka seng bad ban pynsaphriang ha kylleng ki kyndong kynshrot jong ka jylla bad ki paidbah kin jied iaka BJP ban ialam iaka sorkar haka jylla.
