Shillong Rymphang 21: Da ki hajar ngut ki paidbah kila iashimbynta ha ka jingleit on tep don burom ia u MP ka Lok Sabha u Dr Ricky Andrew Jones Syngkon hynne ka sngi Saitjain ha kaba la sakhi ia ka jingiam briew kaba la pynmyllung ia ki paidbah.
La sdang ia ka lehniam ba nyngkong ha iingsah jong u Dr. Ricky ha Nongsder ha kaba la pynlong ia ka lehniam kaba khatduh da ka Balang Presbyterian hashwa ban rah pat ia ka met sha ka madan ka ICAR ban pynlong ia ka jingleh burom kaba khatduh.
Ha ka jingialang ban ai burom bad ban sngewlem ia kaba la wan ban iashimbynta da u Symbud Myntri Rangbah ka Jylla u Bah Sniawbhalang, u Nongialam ka Liang Pyrshah ha ka iingdorbar thawain ka jylla u Dr Mukul Sangma, u MP na Mizoram u Richard Vanlalhmangaiha, ki MLA, MDC, ki nongialam bad ki nongkyrshan na ka seng VPP, ki nonghikai na ki skulbah, ki riewpawkhmat ka jylla bad ki paitbah kiba la wan na kylleng jong ka jylla Meghalaya.
Ha kane ka jingialang la ioh ia ka jingkren na ka shnong Nongsder, na ka skulbah NEHU, na ka Sorkar Jylla, na ka seng VPP bad na ka iing ka sem jong u Dr Ricky Syngkon.
“Ngin buh sharud ia ka Party ngin tei ia ka Jylla”, ki kyntien kiba kren u Dr Ricky ia u Bah Sniawbhalang
U Bah Sniawbhalang ula ong, ha ka por ba ula iakynduh ia u Dr Ricky Syngkon ha Airport ban leit sha Delhi ula kren da kaba ong, ba dei ban buh ia ka seng sain pyrthei sharud ban tei ia ka jylla bad kane kala pynlung bad pynsahnud ia u bad ym shim la poi pyrkhat ba u Dr Ricky un iehnoh kloi na kane ka sla pyrthei.
“Baroh ngi tip lut, u dei u briew uba don ia ka kyrdan, u briew uba bha mynsiem bad uba lehrit bad u briew uba la don ia ka jingshemphang ha kiba bun ki liang, uba ieid bad uba tieng ia u Blei bad ula long ka nuksa ia kiwei pat ban long kiba jemnud, ba jaijai bad kiba lehrit” ong u Bah Sniawbhalang.
Ula ong, ba ka jingiap u Dr Ricky kam dei ka jingduh tang ia ka iing ka jongu, hynrei kadei ruh ka jingduh ia ka jylla, ka sorkar bad ia ki samla kaba u long kum ka nuksa ia ki baroh.
Ka jingleit noh shakhamt jong u Dr Ricky kan pynkynmaw ia ngi ban ieng ha ka nongrim kaba skhem bad ban pynjanai shuh shuh, ong u Bah Ardent
U President ka VPP u Bah Ardent Basiawmoit ula ong, ba ha ka por ba ula rem ia ka elekshon MLA ula don ia ka jingmut jingpyrkhat kaba khia ban iehnoh ia ka kam saiñ pyrthei hynrei u Dr Ricky ula wan ban ai mynsiem ia u ba ym dei ban iehnoh hynrei un iai bteng ban shakri ia ka ri bad ka jaidbynriew.
U Bah Ardent ula ainguh ia u Blei ba ula sei na ka ri ia u briew bad ia u nongialam bakhraw uba la phla ia ka kyrteng ka jongu ha ka ri India baroh kawei bad ula pyni ruh ia ka jinglong kaba sngewrit, ka nam kaba bha, ka jinglong kaba lah ban shaniah, uba don ia ka jingkitkhlieh.
“Shisha ym don kyntien ban iakren ia kaei kaba la jia hynrei ka don ha ka jinglong briew kaba sngew ba ym lah ban bujli shuh, hynrei ngi ngeit ba u Blei u don ia ka jingthmu kaba bha tam na ka bynta ka jong ngi kum ka jaidbynriew lehse ka long ka jingtynjuh ia ka jaidbynriew ba ngim dei ban lehsting haba u Blei u sei ia ki briew ban shakri ia ngi, ki briew kiba don ka jingkitkhlieh bad ngim dei ban sngewsarong kum ki paitbah namar lada wan ka jingjia kaba kumne ka pynpangmet bad pynsyier mynsiem bun ki paitbah haba ki wan ban kdup ia nga, nga sngewthuh ia ka jingrit mysniem ka jongki hynrei ngan ong, ngi long kum kawei ka longiing, shisha ngi sngew ba kum uwei u paia uba khraw uba khlain ula khyllem noh napdeng ka jong ngi bad kum ka party haba ngi trei, ngi trei da ka jingsngewthuh da ka nongrim kaba shai bad ka nongrim Blei kaba ngi ju ong, ba ngim lah ban iapeiñ lada long kumno kumno khnang ba ngin lah ban wanrah ia ka synshar khaddar” la ong u Bah Ardent.
Ula ong, “Ka jingleit noh u Dr Ricky shakhmat kan long ka jingpynkynmaw ia ngi ba ngin ieng ha ka nongrim kaba skhem bad ban pynjanai shuh shuh ha ka jingiaid lynti ka jong ngi badn gi don ban ong khublei shibun ia u Blei uba la ia ngi ia une u shakri uba khraw bad ngi iohi ba kam don kaei kaei kaba u Blei un ym lah ban leh ia kita ki kam kiba phylla bad lada u Blei u mon ban kyntiew ia uno uno u briew un ym don mano mano ba lah ban khang”.
Hadien ba la ioh ia ka jingkren, la aiti sha ka Balang Presbyterian ban pyniaid ia ka jingiaseng bad ban pyndep ia ka jinglehniam bad hadien kane la rah noh ia ka met jong u Dr Ricky Syngkon ban leit tep don burom ha u Lum Jingtep ka Balang Presbyterian ha Sumer ia kaba la leit ban synran da ki paidbah.
