Shillong, Iaiong 12 : U Symbud Myntri Rangbah ka Jylla Bah Prestone Tynsong hynne ka sngi Balang ula ong ba ka Sorkar Jylla kala iasaid hakhmat ka Iingkashari Meghalaya High Court ba kan shah ha kaban pyntreikam ia ka Roster System naduh mynta shakhmat (Prospectively).
“Hadien ba ka Iingkashari kala pynmih ia ka hukum ha u 2022, ngi la file ia ka affidavit (halor kane ka kam) ym duna ia k alai sien ha kaba ngi la iasaid bad ka Iingkashari ba kan shah ia ngi (Sorkar) ba ngin pyntreikam ia ka Roster System naduh mynta shakhmat ym naduh ki snem bala leit noh” ong u Bah Prestone haba iakren bad ki nongthoh khubor.
“Hynrei ka Iingkashari ha katei ka por kala pynbor ia ngi ba ngi dei ban pyntreikam naduh ki snem bala leit noh kata naduh ba sdang pyntreikam ia ka State Reservation Policy” ula ong haba jubab ia ka jingkylli ba iadei bad ka jingdawa jong ka Voice of the People Party ban pynsangeh shuwa ia ka jingtreikam jong ka Roster System katba ym pat lah ban pynbeit janai ia ka State Reservation Policy.
U Bah Prestone u pyntip ba shen ka Sorkar kan sa khot ia ka jingialang jong ka Kynhun Myntri bad ka jingialang jong baroh ki seng sain pyrthei na ka bynta ban iakren halor ka Roster System.
“Ngi dang ap ia u Myntri Rangbah ba un wan poi sha Shillong bad ngin sa khot ia ka jingialang. Ngin sa khot ia ka jingialang ka Kynhun Myntri bad kumjuh ruh jong baroh ki seng sain pyrthei bad baroh ki nongialam kiba don ka jingkit khlieh bad ngin sa iasyllok kumno ba ngin iaid shakhmat” ula ong.
Haba kylli, u Symbud Myntri Rangbah ula ong “Ngam don hok ban jubab ha ka jaka jong ka Iingkashari High Court hynrei kaei kaba nga ong, ka mat kala shai kdar ba ngi la dep iasaid namar ngi kwah ban pyntreikam naduh mynta shakhmat hynrei ka Iingkashari kala pynbor bad buh ha ka jingthoh ba dei ban pyntreikam naduh bas dang treikam ka Reservation Policy. Namar kata, kumba ka long mynta hi kane ka sah kumne”.
