Shillong Nailar 28: U Vice Chancellor jong ka North Eastern Hill University (NEHU) Prof Prabha Shankar Shukla hynne ka sngi nyngkong, ula iaroh iaka jingieng skhem jong ki College kiba pyniasoh bad ka NEHU, ban pyntreikam mardor iaka Four-Year Undergraduate Programme (FYUP) kumba la maitphang ha ka National Education Policy (NEP) 2020.
Katkum ka kyrwoh khubor kaba la pyllait daka skulbah kala ong ba ha ka jingsdnag iaka Academic Session jongu 2023-24, ka NEHU ryngkat bad ki College kiba la pyniasoh kila iaid lang ban wanrah iaka jingkylla ha ka jingiaid lynti jong ka pule puthi ban nang kyntiew bad pynriewspah iaka jinglong jingman jongka Higher Education hapoh Meghalaya.
Hapoh ka jingialam u Prof Prabha Shankar Shukla, ka NEHU kala pynbna ban sdang iaka FYUP Scheme kaba iaid ryngkat bad ka NEP 2020, kaba thmu ban kyntiew iaka kyrdan ha ka pule puthi bad ban kyntiew iaka roi ka par jong ki samla pule.
“Ha ka jingiaid jong kine ki 45 sngi jong ka jingsdnag iaka academic session, u Vice-Chancellor ula pynpaw iaka jingsngewhun halor ka jingpdiang lang da baroh ki College kiba la pyniasoh bad ka NEHU ban wanrah iaka jingkylla” la pynpaw ha ka kyrwoh bad ka bynrap ba ym shim la don wat tang kawei ka college ruh kaba la pan ban pynkynriah ia kane ka jingpyntreikam, kaba pyni ia ka jingtrei shitom jong kitei ki jaka pule ban kyntiew iaka pule puthi ban kynjoh iaka thong.
U Prof Shukla ula pynapw iaka jingsngewnguh ia ki bor pyniaid College Administrations kiba la shimkhia ban pynthikna ba kan don ka jingiaid beit iaid ryntih ha ka jingpyntreikam iaka FYUP Scheme bad ula pynpaw ruh ka jingsngewnguh ia ka jingtrei borbah jong ki Principal jong ki college, kiba la shimkhia naduh ba sdang haduh ban da lam sha ka lynti ban shim iaka rai ban pyntreikam iaka FYUP Scheme.
“Ka jingtrei shitom khlem shongthait ka jongki na ka bynta ban kyntiew iaka higher education ha Meghalaya bad ban iada iaka bha ka miat jong ki samla pule ka long kaei kaei kaba yn ym lah satia ban klet” la ong u VC.
Da ka mynsiem jong ka jingkhuid jingsuba bad jingiatreilang, u Prof Shukla ula pynbna iaki Detailed Evaluation Procedures, ryngkat bad ki Ordinances bad Regulations kiba synshar ia kitei ki procedures, ha kaba yn sa pyntip sha ki College kiba pyniasoh bad ka NEHU.
Ha kawei pat ka liang u Prof Shukla ula khot la wer ruh ia ka Meghalaya College Teachers Association (MCTA) ban iakren ban pynbeit ia kino kino ki jingsngewkhia.
“U Prof Shukla ula shim ia kane ka kabu ban pynpaw ha kaba iadei bad ki kam kiba iadonbynta bad ka Meghalaya College Teachers’ Association (MCTA) bad ka nongrim kaba ki ieng halor ka non-cooperation ne ka jingbym treh ban iatreilang. Naka bynta ka bha ka miat jong ki samla pule ha ka thaiñ shatei lam mihngi baroh kawei, ula kyntu iaka MTCA ba kan pyrkhat biang iaka sienjam ka jongka. U Prof Shukla ula pynpaw iaka jingkloi ban iakren ban pynbeit ia kano kano ka jingeh kaba sngewkhia bad ula khot la wer ruh iaka MCTA ban iakren khnang ba yn lah ban pynbeit bad poi sha ka jingiasngewthuh jingmut bad ban weng ia kino kino ki jingeh” la pynpaw haka kyrwoh.
Nalor kane, u Prof Shukla ula kitbok kitrwiang ia baroh ki jaka pule bad ia ki samla pule kiba don hapoh ka shatri jong ka NEHU.
