Shillong Nohprah 18: U Lat ka jylla Arunachal Pradesh bad Meghalaya u Brig. (Dr.) B.D. Mishra (Retd.) ula iashimbynta ha ka jingrakhe Jubili Ksiar jong ka North Eastern Council (NEC) kaba la long hynne ka sngi u Blei ha nongbah Shillong.
Ia kane ka jingrakhe la pynshongkun da ka jingiadonlang u Myntri Rangbahduh ka ri u Narendra Modi bad u Myntri Kam Pohiing ka ri uba long ruh u Chairman ka NEC u Amit Shah.
U Lat ka jylla u ngeit skhem ba daka jingpynkylla thymmai iaka ‘NEC General Guidelines’ jong u snem 2015, ka Council kala trei borbah ha ka ban shimkhia ia ki jingangnud bad jngphohsniew jong ki paidbah ka thain shatei lam mihngi.
“Ka NEC kala long kum ka centre ha ka ban pynbiang bad pyniaid iaki kam ki jam, ka buit treikam, ka jingnang jingstad bad jingshemphangbad ka Council kan lah ban pynurlong iaka thong jong ka bad kan long ruh kum ka jingaibor iaka ‘Act East’ Policy jong u Myntri Rangbah duh ka ri u Narendra Modi” la pynpaw u Lat haka kyrwoh khubor.
U Lat ula pynpaw ruh baka NEC ka phaikhmat bha ha ka jingseng iaki kam lajong kiba long kum ki lad kamai jakpoh, start up bad ki prokram ban saindur iaki sap ki phong na ka bynta ban pynmih iaki kam ki jam ha ka thaiñ shatei lammihngi jong ka ri.
Ki samla jong ka thaiñ ki donkam shuh shuh iaka jingai mynsiem ban sdang iaki kam lyngba ka Start Up ha ka kam jngohkai, kam ri iaki mrad, ki projek kiba iadei bad ki siej bad ki syntiew ki skud jong ka NEC, kiba iarap ruh ha ka ban rat dyngkhong ia ki kam kieng atiar kiba la don la slem haka thaiñ.
U Lat uba la iohi iaka thaiñ naduh u snem 1960 kum u ophisar shipai jongka Indian Army , u ngeit skhem ba da ka jingshimkhia ban punurlong iaki jingangnud jong ki samla lyngba ka NEC, kane kan lah ban wanrah iaka jingkylla ha ka roi ka par jong ka thaiñ, ia kaba la kyrkhu da ka jingdon ia ki deiriti bad ki riti dustur, ka jinglong jingman jong ki jaka, ka jingitynnad jong ki mei mariang, ki kam thaiñ jingthaiñ bad kaba don ruh iaki wah kiba lah ban pynmih iaka bording elektrik bad ki mar poh khyndew kiba kordor.
Ka long kaba sngewsih ba ia kitei ki sienjam kiba kongsan, ki dang don hapdeng ka jingiasyllok haduh mynta.
