Shillong, K’lyngkot 9: U Lat ka jylla Meghalaya CH Vijayashankar ha ka sngi Palei, u la iaroh ia ka jingtrei shitom ba khlem shongthait jong ka Indian Council of Agricultural Research (ICAR) for North Eastern Hill Region (NEH), kaba don ha Umiam ha Ri Bhoi district.
U Lat ka jylla u la iashimbynta ha ka jingrakhe jubili ksiar ban lehkmen ia ka jingdap 50 snem jong ka jingshakri ba aiti lut jong ka ICAR NEH ha kaba pynkylla dur ia ka rep ka riang bad ki bynta ba iadei bad ki kam rep ha kane ka thain shatei lammihngi – ha ka jingiadon lang u Myntri ka sorkar pdeng ba khmih ia ka kam rep u Shivraj Singh Chouhan bad u Myntri Rangbah ka Jylla Meghalaya Conrad Sangma bad kiwei kiwei.
Ka President ka Ri India Droupadi Murmu kala iashimbynta ha kane ka jingrakhe lyngba ki kor online bad ai ruh ia ka jingkren ba aimynsiem, bad iaroh ia ka jingsynniang jong ka ICAR ban kyntiew ia ka rep ka riang bad ki paid riewlum hapoh ka thain.
Ha ba ai jingkren, u Lat u la pynpaw ruh ia ka jingdonkam jong ki skhim kiba bun kiba la pyniaid da ka sorkar pdeng na ka bynta ka jingbha jingmiat jong ki nongrep.
U la ban jur ia ka jingdonkam ban pyniasoh lang ia ki rukom rep tynrai bad ki kor ki bor kiba mynta ban pynthikna ia ka jingroi kaba neh bad ban kyntiew ia ka rep ka riang ba khlem ai dawai nalor ka kam rep soh rep pai bad kiwei kiwei ha ka thain.
U Myntri kam rep ka sorkar pdeng, u Shivraj Singh Chouhan, u la ai jingkren ruh ha kane ka jingïalang, da kaba pynpaw ïa ka jingkut jingmut jong ka Sorkar India ban pynkylla ïa ka rep ka riang lyngba ki skhim ba kongsan bad ka jingpynleit jingmut ba kyrpang ïa ka thaiñ shatei lammihngi.
Ia kane ka jingialang la pynkut da ka jingkut jingmut kaba thymmai ban wanrah ia ki buit ki bor,ka jingiatreilang, bad ki rukom rep kiba lah ban neh, ki ban pynthikna ia ka lawei kaba roi na ka bynta ka thain shatei lammihngi bad ka Ri baroh kawei.
 for North Eastern Hill Region (NEH), kaba don ha Umiam ha Ri Bhoi district.){kind=link}