Shillong, Jymmang 13: U Lat ka Jylla u CH Vijayashankar hynne ka sngi u la ong ba ka jingdih drok ka ktah ym tang ïa ki briew shimet hynrei ïa ka koit ka khiah ki longïing longsem jong ngi, ki khun samla bad iaka imlang sahlang.
Haba kren ha ka prokram pynsngewthuh paidbah halor ka jingdih drok ba la pynlong hapoh ka Nasha Mukt Bharat Abhiyaan ha Raj Bhavan, u Lat u la ïaroh ïa ka jingtrei shitom jong baroh ki seng kiba ïatreilang bad ka Sorkar Jylla na ka bynta ban rat dkhong ai u drok.
U Lat u la ai khublei khamtam ia ka projek Drug Reduction, Elimination and Action Mission (DREAM) ba la sdang da ka Sorkar jylla ban rat dkhong ïa u drok bad ki jingdih pynbuaid kata ka Nasha Mukt Meghalaya.
Hashua kane u Lat u la pynher lama ruh ia ka kali pyntip paidbah lane ka Nasha Mukt Bharat Abhiyaan Awareness Vehicle na Raj Bhavan.
Kane ka kali ka dei shi bynta jong ka jingpynsngewthuh paidbah hapoh ka Jylla baroh kawei ban pynphriang ïa ka khubor ban pyllait na u drok ha kylleng ki skul, ki kolej, bad ki shnong ki thaw.
Ïa kane ka jingïalap pyrshah drok la pynïaid lang da ka Raj Bhavan Meghalaya ha ryngkat ka jingïatreilang bad ka tnat Social Welfare, Anti-Narcotics Task Force, ka Prajapita Brahma Kumaris Ishwariya Vishwa Vidyalaya, ka DREAM mission bad ka Rajyoga Education and Research Foundation.
Ha kane ka jingialang la pynkular ban ialeh pyrshah ia ka jingdih drok ba la ialam da ki dkhot jong ka Brahma Kumaris, ha kaba baroh ki nongiashim bynta ki la kular ban kiar na ki jingdih bad ban pynsaphriang ia ka jingtip ha ki shnong ki thaw.
Ha kane ka sngi la ioh ia ka jingkren naka Brahma Kumari Sheela Didi kaba dei ka Chairperson jong ka Education Wing jong ka Rajyoga Education and Research Foundation, Mount Abu.
Ka Brahma Kumari Sheela Didi ka la kren shaphang ka bor na lade ban ialeh pyrshah ïa ka jingdih buaid bad ban im ka jingim kaba ïahap, da kaba pynksan ba ka jinghikai kaba pynshong nongrim ha ka dor ka long kaba donkam ha kaba tehlakam ïa ka jingdih buaid.
La ioh jingkren na uwei u Rangbah Shnong, Nongmihkhmat na kawei ka seng trei mon sngewbha, bad na u Pravin Bakshi, IAS, Commissioner & Secretary, ka tnad Social Welfare, ha kaba kiba la kren shaphang ki jingpyrshang jong ka Sorkar bad ki jingeh ha kaba ïadei bad ka jingdih buaid ha baroh kawei ka Jylla.
Ha kane ka prokram la kynthup ruh ïa ka Technical Session kaba kynthup ïa ki jingpyni bad ki jingkren na ka Brahma Kumari Sheela Didi, halor ki lad pynioh bor na lade ban ialeh pyrshah ïa ka jingdih buaid.
U nongmihkhmat na ka tnad Social Welfare haka jingkren u la ïathuh lyngkot shaphang ka Projek DREAM, kaba shim ïa ka buit treikam ba bun bynta kaba kynthup ïa ka jingïada, ka jingsumar, ban iatreilang bad ki paidbah ban rat dkhong ïa drok.
Naka liang ka tnat Anti-Narcotic Task Force (ANTF) kala pyni ruh halor ki bynta treikam bad ki jinglong jingman ha ka jingkhaii bad jingpyndonkam ia u drok ha ka Jylla Meghalaya.
Kane ka jingïalang ka pyni ha ka jingpyrshang lang jong ka Sorkar Jylla, ki seng iatreilang, ki Enforcement Agencies ki kynhun niam ban pynsngewthuh, ban iada na ka jingdih drok, bad ban kyntiew ia ka Meghalaya kaba koit ba khiah, kaba donbor, bad kaba lait na u drok.
