Iaroh u DyCM ia ka KSU Delhi Unit ba long ka nongiada ia ki luilui na ki riew bymman

Delhi Jymmang 24: U Symbud Myntri Rangbah ka Jylla u Bah Prestone Tynsong ula iaroh ia ka Khasi Students Union (KSU) Delhi Unit kaba la trei shitom ban ai jingiarap bad ban pyllait ia ki mynsiem kiba lui lui na ki kti jong ki bymman ha poh ka nongbah Delhi.

U Bah Prestone ula kren ia kane kum u kongsan ha ka jingiakob Mr & Ms Hynniewtrep kaba la pynlong ha Meghalaya House, Dr APJ Abdul Kalam Road da ka KSU Delhi Unit.

“Ki baieid bathoin ki jong ngi kiba don bad kiba trei hangne kin iadonlang hangne ban ai mysniem ia ka KSU Delhi Unit bad ngi ngeit skhem ba kan dang iai bteng ban trei kham bha bad nga ngeit skhem ruh ba ka KSU hapoh ka jingialam u Bah Lambokstarwelll Marngar kan dang lah ban pyniar ia ki thapniang ki jongka ha kiwei kiwei ki jylla jong ka ri”.

“Ym duna ia ka 15 sien ba ka KSU kala ioh ban pyllait bad iarap ia ki mynsiem kiba lui lui, kiba la wan najngai ban wad kam hynrei kaba sngewsih ka long ba kila poi pynban ha ki jaka ki bym dei bad bun ngut ki mynsiem briew kila ioh ia ka jingiada na kane ka Unit” la ong u Bah Prestone.

U Symbud Myntri Rangbah ula ong, “Na ka liang jong ka sorkar Meghalaya ka ai khublei kyrpang ia u President, Secretary bad ia baroh ki dkhot ka KSU Delhi Unitr bad ka sorkar jylla ruh kan don lang bad phi. Wat nym artatien ban iakren ne phone ia u Myntri Rangbah ka jylla ne ia u Symbud Myntri Rangbah. Ngi don hangne ym tang ban shakri ia ki nongshong shnong ha Meghalaya hynrei wat Shabar jong ka jylla ruh”.

Ha kawei pat ka liang u Bah Prestone Tynsong ula pynpaw ia ka jingbym itynnad haba ki para Khasi ne para Garo ki kiar ban iakren iwei ia iwei haba ki don shabar.

“Ka long kaba sngewsih ban iohi, teng teng haba iakynduh para Khasi ne para Gro, i kumba ki tieng ban iakren iwei ia iwei pat bad ki her iap ba ki sheptieng ioh ki hap ban ai jingiarap. Ngi dei ban pynkylla noh ia kane ka rukom pyrkhat la kadei ba ngin iap ngin ia iaplang bad lada ngi im kan long ka burom ia ka jaidbynriew”.

U Symbud Myntri Rangbah ula pynbna ruh ba ka sorkar jylla kan sa shna pynbha noh ia ka Meghalaya House khnang ba yn lah ban ioh ia ka jaka kaba biang ban pynlong ia kino kino ki jingialang.