Shillong, Jymmang 29 : U Myntri Rangbah ka Jylla Conrad K Sangma ha ka sngi Balang, ula ai ka jingiaroh ia ki bor District kiba la shim mar mar ia ki sienjam ban leh eiei halor ki jingpynjulor jong ka Cyclone Remal.
U Myntri Rangbah ula kular ruh ba ka jingai bording, kaba la thut namar ka jingther u slap bad ka eriong ba khie, kan sa sdang biang noh shen.
Ha ka kyrwoh lyngba ka Video, u Conrad ula sam jingtip halor ki jingpynjulor jong ka Cyclone bad ong ba kila don katto katne ki jingpynjulor ha ki katto katne ki jaka jong ka Jylla.
“Ha ki katto katne ki jaka, ngi la duh ia kawei ka mynsiem briew ha Ri-lum Jaintia bad ngi la ai jingiarap song pisa sha ki bahaiing hasem” ula ong.
“Ha kajuh ka por, baroh ki jingpynjulor kiba la jia ha kylleng ki jaka khamtam ki iing briew, ngi la ai ia ki jingkyrshan sha ki. Ki bor District kila sted bha ban leh eiei” ula bynrap.
Haba pynpaw ba ka Jylla kala mad ruh ia ki jingeh halor ka jingsam bording, u CM ula ong “Ia kane ruh, ka MeECL kala trei shitom bha. Ka jingpynjulor kala bun bha bad ka MeECL kala phah ia ki nongtrei sha man ki jaka bad ngi kyrmen ba shen, ka jingai bording kan sa sdang biang ha kiba bun ki jaka jong ka Jylla. Ha kiba bun ki jaka, kila ioh bording mynta bad ha kine ki khyndiat kynta lane ha kane ka shisngi arsngi, baroh ki jaka kin sa ioh bording biang”.
Haba iaroh ia ki bor District ha kane ka jingwan lynshop ka cyclone Remal, u Conrad ula ong “Nga kwah ruh ban shim ia ka kabu ha kaban ai khublei ia baroh ki nongtrei jong ki Tnad bapher bapher bad khamtam eh ia ki bor District kiba la treikam bha. Shisngi arsngi shuwa ka cyclone kan wan lynshop ia ngi, ngi la shong ia ka jingialang bishar kam ha ryngkat u Symbud Myntri Rangbah bad ki Heh Ophisar bad ngi kmen bha ia ka rukom pynkhreh jong ki bor District”.
“Hooidm lada don kino kino ki jingeh kaba ki paidbah ki mad, sngewbha pyntip sha ki Deputy Commissioner lane phi lah ban phone ha ka CM-Connect ha u 1971” ula bynrap.
