Shillong, Nohprah 9: U Myntri Rangbah ka Jylla u Conrad K Sangma ula pdiang ia ka jingkren jong u Myntri Rangbah ka Assam Himanta Biswa Sarma bad ong ba kane ka dei ka jingiakop ba koit ba khiah, ka ban kyntiew ia ka thain Shatei Lam Mihngi kum ka jaka jong ka tem ka put.
“Nga sngew beit ba ka long kaba biang ban don ki jingiakhun mano ba lah para ma ngi bad kadei kaba kyntiew ia ka thain shatei lam mihngi kum ka jaka kaba khraw” ong u Conrad Sangma haba iakren bad ki nongthoh khubor hynne ka sngi.
“Ka Meghalaya bad ka Shillong kin don beit ia la ka jinglong kyrpang namar ki don bun kiei kiei kiba iapher haba phai sha ka Shillong bad Meghalaya bad bun kiei kiei kiba iapher haba nujor pat bad ka Assam bad Guwahati” ula ong.
U Sangma ula ong, man la ka jylla ka don ia ka jingkhlain kaba kyrpang bad ki kabu ha ka jingiakob bad ban pyndonkam ia kitei ki jingkhlain ka dei ban long ka buit ia man la ki sorkar jylla.
“Ngi hi ngim iohi ia ka kum ka jingiakob, hynrei nga tharai ha baroh hi, u pyrshang ban kyntiew ia ka thain baroh kawei kum ka jaka jong ka tem ka put” ong u Sangma.
“Ngi lah iai ong beit, ba ka thain shatei lammihngi kadei ka jaka jong ka tem ka put bad ngi kyrmen ba baroh ki jylla ka thain shatei lammihngi kin iaid lang ha kaban thaw ia ki bynta jongka jingiakob kaba koit ba khiah bad ban kyntiew ia ka tem ka put bad ban pynmih ia ka ioh ka kot lyngba ki tamasa ka tem ka put na ka bynta ka ri baroh bad ia ka pyrthei”.
