Shillong, Jylliew 05 : U Nongialam ka United Democratic Party (UDP) bad Myntri Sorkar Bah Paul Lyngdoh hynne ka sngi Nyngkong, ula ong ba ki paid Garo ki kham long rangbah bad kham stad ban bishar haba nujor bad ki Khasi.
Haba pynpaw ia ka jingsngew jong u halor ka jinglong jingman namar ka kam Reservation Policy bad Roster System, u Bah Paul ula ong “Ki Garo ki kham long rangbah bad kham stad haba ianujor bad ngi (ki Khasi). Ngi la shu pynheh nia kai ha kiba bun ki kam kibym donkam”.
“Kum ka nuksa, katto katne ki nia kila mih halor u Myntri Rangbah Khasi ha u 2023, kam shym la don satia kaba kum kane ha Ri-lum Garo. Hynrei kaei kaba ki leh ka long ba ki pynkut ia baroh ki jingkyrmen ba ngin ioh ia u Myntri Rangbah naka Jaidbynriew Khasi da kaba pynthikna ba na ki 24 seat ha Ri-lum Garo, haduh 18 seat kala leit sha ka NPP. Ki khlem heh nia satia halor kane hynrei dei ma ngi kila pynmih ia baroh ki nia” ula ong.
Haba kylli la ka jingbishar thymmai ia ka Reservation Policy kan pynkut noh ia ka jingeh ha ka jingbymiohkam iohjam ha Jylla, u Bah Paul ula ong ‘Da leilei ruh kan ym lah”.
Ula batai ba ki don haduh 500 tylli ki kam kiba lait hapoh ka Sorkar bad ki Undertaking ha ka shisnem bad kane ka dei kaba nang ring sdot ha ka iohkam iohjam.
“Ha kane ka juk spah snem ba 21, ka Jylla ka dei ban iakren kham bun eh ha ki kam kum ka kam jngohkai, kam thain jingthait, kam shangkai ha ki shnong nongkyndong, halor ki project ba iarap bei pisa ka Sorkar, shibun ki lad iohkam bad kiwei kiwei. Namar kata, nga sngew ba ka jingpyrkhat jong ki ban buh hakhmat ia ki mat ba kongsan ka long kaba bakla shibun” ong u Bah Paul.
U Myntri ula ong ba ka ishu kaba ktah shisha ka dei ka jingjyllei ki nongdih droks, ka jingdon ki Longkmie ba khlem lok, ka jingduna bam tei met ki Khynnah, ka jingiap ki Khunlung ba dang kha, ka jingbym don jaka puta bad kiwei kiwei. Kine ki dei ki kam kiba ktah ia ka Jylla.
“Balei ba kim shym la khring ia u paidbah ka dei namar ba kim don satia ki nongkynshut ban bsut ia ka mynsiem iashun bad ba kim dei ki riewsain pyrthei, ta ka daw kim paw satia kine ki ishu” ula pynpaw.
. Ngi la shu pynheh nia kai ha kiba bun ki kam kibym donkam”.){kind=link}