Shillong, Jymmang 12 : Ka Bharatiya Janata Party (BJP)-Meghalaya, ha ka sngi Saitjain kala pdiang ia ka jingthung ia ka kong Iadashisha Nongrang kum ka Director General of Police (DGP) ba thymmai ka Jylla.
Ka BJP kala kam ba kane ka jingjied ka dei kaba la ai jingmut jur bha da ka party sha u Myntri Rangbah ha ki khyndiat sngi bala leit noh.
Ha ka kyrwoh, u Nongaiktien ka BJP Bah M Kharkrang ula ong “Ka Meghalaya BJP ka shim ia kane ka kabu ban ai khublei ia u Myntri Rangbah bad ia ka Sorkar ba ka shim ia kane ka rai kaba biang bha, kaba long kat kum ka jingkwah jong ka State party”.
Haba ai khublei ia ka Kong Nongrang halor kane ka jingkiew kyrdan ban bat ia kane ka shuki, u Bah Kharkrang ula ong “Ka Meghalaya BJP ka duwai ba u Blei un ai ka bor bad ka jingstad kaba donkam ba kan ialam ia ka Tnad Pulit ha ka jingshakri jong ka kum ka DGP”.
“Ka BJP, kum ka party kaba la ju ieng beit na ka bynta ki jingeh jong ki kynthei bad ki riewlum, ka sngew sarong ba ka Meghalaya kala ioh ia ka Longkmie ba nyngkong eh ban bat kum ka DGP bad ka Party ka kitbok ba kan ioh kheit ia u soh ka jingjop ha ka jingshakri ia ka kam bala bynshet ha ka” ula bynrap.
