Nongpoh, Risaw 13 : Ka Federation of Khasi Jaintia and Garo People(FKJGP), Mawhati Circle bad Umsning Circle, kila noh jingiarap da ka song pisa sha ka seng Association of Person with Disability (APD) Ri-Bhoi, kaba angnud ban ai jinghikai ia ki briew kiba don jingduna ha ki dkhot met ha ki kam shna jingshna bad kam thain jingthain.
Kane ka seng hapoh ka jingialam u Samla Tinus Rynjah President Mawhati Circle bad Samla Shem Biangpor Makri Vice President Umsning Circle, kila leit ai ia kane ka song jingiarap sha ki Nongialam ka APD hapoh ka Ophis treikam kaba don ha Umsning Patarim. Ia kane ka song pisa la aiti ha ka President kong Blunisha Nongbet.
Haba kren ha ka jingialang ba lyngkot, ki Nongialam ka FKJGP kila pynpaw ka jingsngew myllung ban iohi ba katei ka seng kiba duna dkhot met, kala trei shitom watla ki duna ha ki bynta bapher bapher ki dkhot met, hynrei ki don pat ka jingangnud wat ban pynlong ki program ai jinghikai naka bynta ki para dkhot haki kam thaiñ bad shna jingshna.
Ka seng FKJGP kala kyrpad ia ka sorkar ba ka dei ban phaikhmat kyrpang sha kum kitei ki briew bala thaw kyrpang da u Blei ban noh ia ki lad jingiarap.
Ka President ka APD Kong Blunisha Nongeut kala pynpaw ka jingsngewnguh kaba khraw iaka seng FKJGP kiba la kloi ban noh ka kti kamon ka diang ban kynmaw lem iaki ha kum kane ka por ba ki donkam.
Kala ong ruh ba naka liang jong ki kum ka kynhun kiba duna dkhot met ki angnud ban don kawei ka ïing ba kin shong lang hajuh naka bynta ban treikam khamtam ki don ruh ka jingangnud ban ieng hala ki jong ki kjat lyngba ka sap kyrpang bala ai u Blei ba kin lah ban pynmih pisa ban kyrshan dalade ialade.
