Shillong, Rymphang 25 : U Symbud Myntri Rangbah ki kam pynroi sor Bah Sniawbhalang Dhar ha ka sngi Ba-ar ula pyntip ba ka Regional Committee ka West Jaintia Hills, kan sa aiti noh shen ia ka kaiphod iapynbeit khappud sha ka Sorkar Jylla.
Haba iakren bad ki nongthoh khubor, u Bah Sniawbha uba la pyntip ba u dang shu dep pyniaid ia ka jingialang jong ka Regional Committee ha ka 19 tarik Nohprah, 2024.
“Ha kane ka jingialang, ngi la bthah ia baroh ki Ophisar ba kin pyndep iala ka kamram bad aiti ia ka kaiphod sha ka Committeee, ka ban sa aiti pat ia ka kaiphod jong nga sha ka Jylla hashuwa ka jing ialang hapdeng u Myntri Rangbah ka Meghalaya bad Assam” ula ong.
Kat kum ka jingong jong u, ki kam jong baroh ki Regional Committee ki dang iaid shakhmat.
