Tura, Jylliew 06 : Uwei u samla ba 21 snem, ula iap na ka jingthombor jong u Hati ha South Garo Hills katba u dang wan phai shala iing na ka iing iap briew ha Alokpang, South Garo Hills ha ka miet sngi Nyngkong.
Kane ka jingjia kala jia ha ka por 11 baje mynmiet katba une u samla ba kyrteng u Sengkam R Marak, u dang iaid lynti shala iing hadien ba mih na Iing iap briew. Ula iakynduh ia u hati ha surok ba don harud ka Wah Simsang,kaba jngai kumba 30 km na sor Baghmara.
U Hati ula thombor ia une u samla bad ula kyrdem ia u haduh da iap hashuwa ba un phet sha khlaw. Ki Pulit kila leit ban shimti noh ia ka met.
Ki Hati khlaw ki ju shang kylleng ki khlaw ka South Garo Hills ban wad jingbam bad bunsien ki ju leit rung sha ki shnong briew ha ka por ba duna bam ha khlaw kata hapdeng u bnai Naiwieng haduh u bnai Jymmang.
