Shillong, K’Lyngkot 20: Ha kawei ka jingjia ba sngewsih, uwei u briew uba ym shym la lah ban ithuh ula iap hajrong u wei u Post eletrik jong ka Mawphlang Sub Station hapoh ka shnong Mawphlang, East Khasi Hills District.
Ia kane ka metiap u rangbah, la sakhi nyngkong da ki paidbah haka por kumba 7 baje mynstep bad hadien kane kila pyntip mar mar shaki bor Pulit jong ka Mawngap PS.
Haba iadei bad kane ka jingjia, u Rangbah Shnong ka shnong Mawphlang u Bah Moon Sunn ula iathuh ba haduh mynta ki nong shong shnong wat ki Pulit ruh kim ithuh satia ia une u lanot namar ym lah ban ithuh iaka dur jong une u rangbah.
U Bah Moon ula iathuh ba ula ioh jingtip ia kane ka jingjia haka por kumba 7 baje mynstep hadien ba ula ioh jingtip na ki riew paidbah kiba iaid kai mynstep.
Ula iathuh ba ia ka dur khmat jong une u rangbah ruh ym shym la ithuh satia bad ki dang wad ban tip ba une u dei naka shnong aiu.
La iathuh ba haduh mynta, ym lah ban tip iaka daw, ka ban pynlong ia une u rangbah ban kiew shajrong u Post Light.
