Dei uba suba pyniap ia u rangbah ha Umtasor
Nongpoh, Jymmang 27 : Uwei u briew uba shah kem halor ka jingsuba pyniap ia u rangbah ha Umtasor Mawdkhar, ula iap kynsan ha ka kti jong ki Pulit ka Nongpoh Police Station katba dang kit ia u sha Hospital.
Une u briew u kyrteng u Phurly Suting ba 52 snem na Umtasor Birskuid, Ri-Bhoi, uba la shah kem ha ki Pulit ka Nongpoh Police Station myn ha ka 24 tarik Jymmang halor ka jingsuba pyniap ia u Amison Muruh ba 35 snem ka rta, uba dei na Umtasor Mawdkhar.
Kat kum ka jingiathuh u Superintendent of Police ka Ri-Bhoi Jagpal Singh Dhanoa, ki Pulit kila register case ia u Phurly hapoh ka kyndon 451/302 IPC bad ka Iingkashari kala aipor 3 sngi ia ki Pulit ban tohkit hapoh ka Police custody.
Hynrei ula iathuh ba ha ka 25 tarik, katba u dang don ha ka police custody, une u briew ula pyni iaka jingshitkhlieh bad sdang pyni ia ka jingbym biang ha ka khlieh ha kaba la kit mar mar ia u sha Civil Hospital Nongpoh ban sumar.
U iathuh ba na Civil Hospital, la pynkit noh mar mar ia u sha MIMHANS Shillong pynban une u briew ula khlad noh ha lynti shuwa ban poi sha MIMHANS.
Ia ka metiap jong une u briew la pynkit noh sha Shillong Civil Hospital ban leh post mortem bad la ring video ruh hapoh ka jingkhmih u Magistrate ka East Khasi Hills ha ka jingdonkam u Medical Officer ka Civil Hospital.
Halor kane ka jingjia, ki Pulit kila register da ka UD case hapoh ka Umiam Police Station bad ka jingtohkit mynta kala iaid shakhmat.
