Shillong, Nailur 18 : Uwei u Nongniah trok ula iap hashen haba ka trok kit clinker ba u niah, kala hap shapoh ka riat ba jylliew bha ha Jowai, West Jaintia Hills District hynnin ka miet shiteng synnia.
Une u Nongniah trok u kyrteng u Kharkupar Phawa ba na ka shnong Sohmynting. Ia ka met jong une u briew la iohtam hynne ka janmiet sngi Nyngkong hadien ka jingtrei shitom jong ki Pulit ka kynhun Search & Rescue Team.
Kane ka trok ka dei kaba mih na ka shnong Lumshnong, East Jaintia Hills. Hynrei dei haba poi ha Wahgate, Jowai kaba don ha National Highway, u nongniah um shym la lah ban tehlakam shuh ia ka kali bad leit tynrah beit beit ia kawei ka dukan shna tyre hashuwa ba noh shapoh ka riat, ong ki Pulit.
Donbok ba u nongtrei jong kane ka dukan shna tyre um shym la don satia hapoh ka dukan ha ka por ba jia kane ka jingjia.
