Tura, Nailar 12 : Uwei u Khynnah ba 12 snem ula duh noh iala ka jingim na ka jingioh ia ka jingpang rabies hadien ka jing shah dait kdew ha West Garo Hills District.
Ki bor Khmih ka Tnad ka Koit ka Khiah kila ban jur ba ki briew ba shah dait ksew ki dei ban leit wut wut ban ai injek rabies haba shah dait ksew namar kane ka jingpang ka lah ban shim ia ka jingim briew 100 na ka 100 lada ym lap ba leit ai injek ha ka pork aba biang.
Une u Khynnah u dei uba na ka shnong Dachimagre ba hap hapoh ka Rongram Block, West Garo Hills. Ia une u khynnah la wan phah sumar ha Tura MCH ha ka 8 tarik Nailar 2023 hadien ka jingpyni dak ia ka jingpang ba tieng ia ka um (hydrophobia), ka jingkynjut bad pang ryndang. Wat hapdeng ka jingsumar, une u khynnah ula khlad noh ha ka 10 tarik, shisngi hadien bala pyllait noh ia u ban leit sha la iing.
Kat kum ka khubor bala ioh, une u Khynnah ula shah dait ksew ha u bnai Jylliew 2023 na ki bynta jong ka kti ka diang. Ha ka jaka ban leit wad dawai, ki bahaiing kila sumar hi dalade da ki kynja kynbat kaba la nang pynsuhthieh ia ka jingpang rabies.
Kane ka jingdaitksew kam shym la jia tang ia une u Khynnah hynrei kala jia ruh ia ka para kynthei bad ka Kmienah jong u. Kane ka para kynthei namar bala jur ka jingmong, kala ioh kloi ia ka jingsumar bad ioh ia ka injek rabies katba ka kmienah jong u ruh ka khlem leit shim dawai hynrei sumar hi da ki buit sumar tynrai.
Ia une u ksew bad ait briew la pyniap noh ha u bnai Jylliew hi hadien ba pynthikna ba u kit ia ka jingpang rabies.
