Kabul, Risaw : Palat 2000 ngut ki briew kila khlad noh na ka jingkyiuh u jumai uba khlain bor 6.3 haka Richter Scale, uba la jia ha ka sngi Saitjaiñ hapoh ka Ri Afghanistan ha kaba da ki spah tylli ki iing kila shah pynjulor ha Herat bad Badghis.
Kane ka jingiap ki briew kadei naka jingkyiuh jong u jumai ua nyngkong uba 6.3 bad uba ar uba don 5.5 bad kila pynjulor lut ia ki iing bad ia ki jingtei bapher bapher.
U Nongaiktien jong ka Taliban hynne ka sngi u Blei, ula pyntip ba kila don 2000 ngut ki briew kiba la iap na ka jingkyiuh u jumai.
Ka Herat Province kaba don hajan khappud bad ka Iran kadei kaba la shah ktah jur na ka jingwan lynshop ka bor mariang bad une u jumai ula pynjulor bad bun ki briew kila shah tap ha ka iing ki jongki kiba la khyllem bad twa.
U Abdul Ghani Baradar, u Deputy Prime Minister uba la shah thung haka Taliban ula pynpaw iaka jingsngewlem ia ki paidbah kiba la duh noh ia la ka jingim bad ia kito kiba mynsaw haka thaiñ Herat bad Badghis.
Ka Taliban kala kyntu ia ki kynhun bapher ban leit mardor sha kitei ki jaka kiba la shah ktah ha u jumai ban iarap lem ha kaban pynkit ia kito kiba la mynsaw sha ki hospital, ban ai jaka sah lem ia ki bad ban ai bam ai dih lem ia ki bad kila bthah ruh ia ki bor kiba dei khmih ba kidei ban pyndonkam ia baroh ki lad ki lynti ban pyllait im ia kito kiba dang sahkut ne shah tap ha ka khyndew ne ki iing kiba la khyllem.
