Nongpoh, Kyllalyngkot 08: Ha kawei ka jingjia aksiden kaba shyrkhei, kawei ka longkmie ka la duh noh ia la ka jingim hadien ka jingshah ban syndet ha ki pipe kiba la hap najrong kawei ka trok kaba dang iaid.
Kane ka jingjia ka la jia hynne ka janmiet ha ka por 4 baje eiei ha surok Umsning Bypass hajan ka shnong Umtrew, Ri Bhoi District.
Kat kum ka jingtip ba la iohlum, la ong ba kane ka longkmie kaba iap ka kyrteng ka Kong Cleris Nongsiej (37) kaba shong basah ha ka shnong Umtrew. Kane ka Longkmie ka dei kaba la don khun 6 ngut bad ka dei ka Nongtrei ka Tnad ka Koit ka Khiah.
La iathuh ba katba kane ka longkmie ka dang iaid lynti, kawei ka trok kit pipe um kala iaid ha kane ka surok hynrei kynsan kynsan, ki pipe um kiba heh, kila hap na kane ka trok trailer bad leit ban beit beit ia kane ka longkmie. Kane ka trok ka dei kaba don u nombor JH 05 CX 4295.
La ong ba kane ka longkmie ka dang don ha lynti sha la iing katba ka dang wan phai na ka jingleit sngewlem sha kawei ka Iing iap briew.
Ki Pulit ki iathuh ba u nongniah jong kane ka trok u la phet krad na katei ka jaka bad ki pulit ki dang thwet ban ioh kem ia u. Ia ka met iap jong kane ka longkmie la pynkit noh sha Nongpoh Civil Hospital ban pyndep ia ki jingdonkam baroh.
