Tura, Naitung 4 : Ka Don Bosco College Tura ka la mad ia ka jingduh kaba khraw hadien ba uwei na ki nongtrei jong ka u la shah tan ha ka um kaba khlaiñ bha ha ka kshaid Pelga Dare haduh ba un da ngam jyllop.
Utei u la lanot ba tip kyrteng kum u Albinus Tirkey u dei uwei na ki nongniah bos ba la rim bha jong katei ka College.
Katei ka jingjia kadei ha ka sngi u Blei ha ka por ba ka sngi ka rang bha kumta u la mih na Ïing ban leit khwai dohkha sha katei ka jaka. Hynrei dei ha ka por ba u dang iaid na um ba ka umbah kaba khlaiñ bor ka la rong ia u bak.
Hadien ba ki khubor ki la poi sha ki bor sorkar halor katei ka jingjia ki bor pulit ki la phah ia ki nong ngam um ryngkat bad ka kynhun jong ka state disaster rescue force ban leit wad. Ka jingwad ka la bteng baroh shisngi hynrei ym shym la lap satia tad haduh ban da kem Ïong rein.
Kumta dei ha ka step sngi Nyngkong ba sdang biang ban wad bad dei ha shwa ka shiteng sngi la lap ia ka met jong u hajan ka kshaid Danchi Wari. Ia ka met jong u mardor la pynkit noh sha Tura Civil Hospital ban leh ia ka post mortem.
Katei ka kshaid Pelga Dare kadei kawei na ki jaka jngohkai ba pawnam bha ha ka thain namar da ki spah ngut ki nongwan kai ki ju wan peit khnang. Ha ka por slap ka um ka ima bha kaba ju poi haduh u pud ba man u snem don beit ki jingjia ngam jyllop hangtei.
