Shillong, Nailar 23 : Ka East Jaintia Hills District khamtam ki shnong khappud ba don markhap ka Bangladesh, kila iam pait dohnud da ka jingduhnoh ia u nongtrei mon sngewbha bad nongiasaid Ain, uba ju kit ia ka khia ka shon bad ju ieng ban iakhun ia ka hok u paidbah ban lait na ki jingshah iuhroit.
Une u Nongtrei monsngewbha bad nongiasaid ain u dei u Bah Kynjaimon Amse, uba la khlad noh ha ka jingaksiden kali ha ka miet sngi Palei ha Khliehriat, ka District Headquarter ka East Jaintia Hills.
Kat kum ka jingiathuh ki Pulit, ka jingaksiden ka long kaba la jubor bha haduh ka kali ba shong u Bah Kynjaimon kala pra phom ha ki bynta ba shakhmat.
La iathuh ba kane ka kali ba shong u Bah Kynjaimon kala leit tynrah ia kawei ka kynroh namar ka jingdum lyoh.
U Superintendent of Police ka District Giri Prasad u pyntip ba ha kane ka jingjia, u Bah Kynjaimon u iadonlang bad laingut kiwei pat, kiba la mynsaw jur ha kane ka jingaksiden kali.
U pyntip ba kane ka jingjia kala jia ha Dkhiah marjan bad ka Petrol Pump. Ia kiba mynsaw la pynkitnoh sha Khliehriat Civil Hospital ban ai jingsumar.
Shi taiew shuwa kane ka jingjia, u bah Kynjaimon Amse ula buh ia ka jingujor hapoh Jaintia Hills Autonomous District Council pyrshah ia ka jingai No-Objection Certificate (NoC) sha ka M/s Meghatop Cement Private Limited ba kan seng ia ka karkhana dewbilat ha Wahiajer, Narpuh Elaka khlem ka jingbit jong ka Dorbar Elaka Narpuh.
U Bah Amse ula byrngem ruh ban tan ia ka JHADC sha Iingkashari lada kam pynduh pyndam noh ia ka NOC.
Lah ban kdew ba u Bah Kynjaimon Amse u dei ruh uba lamkhmat ban iakhun ia ka hok jong ki paidbah ba sah ha ki shnong khappud ka District bad Bangladesh, ba kin ioh ia ki surok kiba paka, ki jaka sumar ba paka, ki mobile network bad kiwei kiwei. Kine ki shnong ki kynthup ia ka Huroi bad Hingaria.
U dei ruh u Nongiasaid Ain uba la tan ia ka Sorkar India bad ka National Highway Authority of India (NHAI) sha Iingkashari Meghalaya High Court halor ka jingsniew palat liam jong ka surok na Ratacherra sha Lumshnong kaba hap hapoh ka National Highway-6 jong ka East Jaintia Hills District.
Dang ha u bnai Rymphang 2023, ka Meghalaya State Legal Service Authority (MSLSA) kala thung ia u Bah Kynjaimon Amse ban long kum u Legal Aid Counsel na ka bynta ka East Jaintia Hills District lane kino kino ki kam ba kyrpang lada ki dei kiba shabar ka District.
U Bah Kynjaimon Amse u dei na ka shnong Umkiang kaba hap hapoh ka Lumshnong C&RD Block,East Jaintia Hills bad haduh ka sngi ka jingiap, u dang bat ia ka kam kum ki Assistant Rangbah Shnong ka shnong Umkiang.
 sha ka M/s Meghatop Cement Private Limited ba kan seng ia ka karkhana dewbilat ha Wahiajer, Narpuh Elaka khlem ka jingbit jong ka Dorbar Elaka Narpuh.){kind=link}