Kaligaon, Naiwieng 05 : Haduh kumba 52 tylli ki sniang kynthup ia ki sniang khun kila iap na ka jingsyllad jong ka jingpang African Swine Fever (ASF) naduh ba kala sdang ha u bnai Risaw mynta u snem ha ki bynta jong ka Udalguri district ka Assam.
Na ka liang u ophisar jong ka tnat Animal Husbandry & Veterinary ka Udalguri, u Dr Nagen Ch. Kalita ula ong hynnin ka sngi Thohdieng ba kila don haduh 52 tylli ki sniang kiba la khlad noh ha u bnai Risaw ba la dep namar ka jingpang ASF.Haduh mynta la hap ruh ban pyniap noh ia 64 tylli ki sniang khnang ban khanglad ia ka jingsaphriang shuh shuh jong kane ka jingpang ASF, onf u Dr. Kalita.
Nalor kata ula ong ruh ba ki nongri jingri kiba la duh noh ia kine ki jingri (sniang) jong ki namar kane ka jingpang kin ioh ia ka jingiarap halor kane ka jingduh noh hadien ba yn pynbna ia kane kum ka jingjia kaba la shah ktah jur.
Ki nongri jingri jong ka Udalguri Farmers’ Cooperative Society kaba hapoh Jangle Borigaon kaba hap hapoh Udalguri Development Block kila duh noh ia ki sniang jong ki namar ka jingpang ASF, bad na ka liang ka tnat veterinary kim banse ban pyniap noh ia ki sniang khnang ban khanglad na ka jingsaphriang jong kane ka jingpang.
Katkum u Dr Kalita la ong ba haduh ym pat don satia ki lad jingsumar na ka bynta kane ka jingpang ASF.Lada uwei u sniang un shah ktah ha kane ka jingpang, kane ka jingpang ka iabit sa sha kiwei pat bad kaba lam sha ka jingiap.Ula ong ruh ba ym don da kiwei pat ki lad ban sumar lait noh tang ban shu pyniap ia ki.
Watla katta ula ong pat ba kane ka jingpang kam iabit satia na ki sniang sha ki briew. Kane ka jingpang sniang kaba shyrkhei ha ka jingiabit ia mynta hi kala ktah jur hapoh ki artylli ki shnong, kata ka No.3 Simliguri bad ka Jangle Borigaon kiba hap hapoh Udalguri district.Ia ki sniang kynthup ki khun sniang la hap ban pyniap hapoh Jangle Borigaon hynnin ka sngi Thohdieng ha ryngkat ka jingiadon lang u Dr Prafulla Konwar bad ka Dr Sangeeta Baro.
Na ka liang u Dr Sulabh Sarma ruh ula iatrei ryngkat lang bad kiwei pat ki heh ka tnat veterinary ha kaba iadei bad kane ka jingpyniap noh ia kine ki sniang hynnin ka sngi.
