Imphal, Nailur 20: Ka kynhun kieng atiar kala ther kuli ia ka kali kaba shong ki shipai jong ka Assam Rifles ha Bishnupur district jong ka jylla Manipur ha ka sngi Thohdieng, ha kaba ar ngut ki shipai kila khald noh bad 5 ngut kila mynsaw.
Kane ka jingshah thombor kala jia ha ka por 5:50 janmiet katba ka kali jong ki Assam Rifles ka dang iaid ha ka surok National Highway 2 hajan ka Nambol Sabal Leikai, ka bym shim la pyntreikam shuh ia ka Armed Forces (Special Powers) Act (AFSPA).
Ki ophisar kila pyntip ba ki kali shipai kila shah ther kuli kynsan katba ka dang iaid na katei ka shnong.
Ki ar ngut ki shipai kiba la khlad noh ki kynthup ia u Nb Sub (GD) Shyam Gurung uba shong basah ha Happy Valley, East Khasi Hills, Meghalaya ha kaba ula iehnoh shadien ia la ka kurim ka Puja Gurung bad u khun shynrang u Milan Gurung.
Sa uwei pat u shipai uba la khald noh udei u Rfn (GD) Ranjeet Singh Kashyap uba shong basah ha ka shnong Balenga Ogayguda ha Bastar district, Chhattisgarh bad ula iehnoh shadien ia la ka kurim ka Savitri Kashyap bad ia ka khun kynthei kaba dang rit ka rta ka Dhani Kashyap.
Haduh mynta kam shym la don kano kano ka kynhun kieng atiar kaban mih shakhmat ha kaban kam ba kala donkti ha katei ka kam thombor. Ki bor shipai kila sdang ban pynlong ia ka jingthwet ia kitei ki runar kiba la donkti ha katei ka kam thombor.
Kane ka jingjia kala pynmih ia ka jingsngewkhia ha kaba iadei bad ka jingshngain ki jaka bad ki thain, ki bym hap hapoh jong ka jingpyntreikam ia ka AFSPA hapoh jylla Manipur, ia kaba ki kynhun kieng atiar kila bteng ban buh ha ka jingma kaba khraw, watla kala don ka jingpyrshang ban iakhun pyrshah ia ki kam lehnoh.
