Ïap 2 ngut ki CRPF ba shah thombor ha ka kynhun kieng atiar

Imphal, Iaiong 27: Ar ngut ki Central Reserve Police Force (CRPF) kila duh noh ia la ka jingim bad arngut kila mynsaw jur, hadien ba ka kynhun kieng atiar kala thombor ia ki, ha ka thaiñ Naransena jongka jylla Manipur.

Kane ka jingjia kala jia hynne dang step phyrngab ha kaba la suba jur ba kidei ki lehnoh Kuki kiba la thombor ia ki CRPF jongka 128 Battalion, kaba pahara ha katei ka thaiñ.

Katei ka jingbthei kaba shyrkhei kala pynmynsaw ia ki 4 ngut ki pulit CRPF kiba kynthup ia u Jadav Das, N. Sarkar, Arup Saini bad u Aftab Hussain. Wat hapdeng ka jingai jingsumar kaba mardor, hynrei u Sub-Inspector ka CRPF u N. Sarkar bad u Head Constable u Arup Saini namar ka jingmynsaw jur kila khlad noh.

Katba u Jadav Das bad u Aftab Hussain, mynta ki dang don hapdeng ka jingshah sumar hapoh hospital, ia kaba ki doctor kila khmih bniah bha iaka jinglong jingman ka jongki.

Uwei u heh pulit ula pyntip ba ka kynhun kiengatiar kala siat pathar nalor lum kaba la sdang naduh ka por 12:30 shiteng synnia bad kila bteng haduh ka por 2:15 mynstep. Ka kynhun kiengatiar kala kawang ruh da u Grenade ha kaba uwei ula leit bthei hapoh ka ktem jong ka 128 Battalion ka CRPF.

La iathuh, ba la buh ia ki pulit CRPF na ka bynta ban ai jingiada ia ka ktem jong ka IRBN bad ki pulit mynta ki dang thwet jur ia ki briew kiba donkti ha katei ka kam thombor.

Kane ka jingjia kala nang pynsniew ia ka jinglong jingman ha ka jylla Manipur, kaba la sdang naduh u Jymmang 2023 ka jingiakynad hapdeng ki ar jaidbynriew.

Kane ka jingiakynad hapdeng ki jaidbynriew Meitei bad ki Kuki kala poi syndon sha u pud ha kaba la duh ia palat 200 ngut ki jingim briew, ka jingjulor ki iing ki sem, ki jaka mane bad kiwei kiwei ki jingdon jingem bad bun kila duh noh ia ka iing ka sem ka jongki.

Dang ha ki khyndiat sngi, kawei ka jingkieng kaba kongsan jong ka surok National Highway 2 ha Kangpokpi District kala julor malu mala namar ka jingpynbthei bomb.