TURA, Jylliew 17: Uwei u nongniah jong ka Autorickshaw ula duh ia la ka jingim na ka jingshah tynrah ha kawei ka Bolero Pickup katba ar ngut kila mynsaw jur ba kynthup ia kawei ka heprit kaba dang 3 snem ka rta.
Kane ka jingjia kala jia haka janmiet jong ka sngi Thohdieng hajan ka Tura Nehru Park.
Katkum ka jingiathuh kiba iohi ia katei ka jingjia, kila iathuh ba ka Bolero Pickup kaba don ia u nombar ML14-6270 kaba la pynher sted bha kala wan na ka liang kaba bakla (Wrong Side) jong ka surok bad kala leit tynrah beit ia katei ka Autorickshaw kaba don ia u nombar ML08D-6239.
Ka jingtynrah kala long kaba jur bha ha kaba ka Autorickshaw kala sied na surok sha ka jaka ba don ki jingthung bad ka kali Bolero ruh kala poi sha kiar jong ka surok.
La pynkit noh mardor ia u nongniah jong ka Autorickshaw u Semson M Sangma, 36 snem ka rta ba shong basah ha ka thaiñ Molmegre, Araimile sha Tura Civil Hospital hynrei ula khlad noh namar ka jingjur palat jong ka jingmynsaw naka jingshah tynrah haka Bolero.
Kawei Jadambe Cheana M Arengh, 28 snem ka rta kaba dei ka kmie jongka khun kynthei ba dang 3 snem ka Emiansha Amadora M Arengh kiba na Danak Dopgre, Araimile kila mynsaw jur ha katei ka jingjia.
Pule lang ia kane: Sikkim : Sahkut haduh 2,464 ki samla pule ha Lachen, Lachung
Peit lang ia kane
