Tura, Lber 01: U Most Rev. Leopoldo Girelli, u Apostolic Nuncio sha ka ri India bad Nepal uba long ruh u ‘Nongrah Tiensyiem’ ne ‘Ambassador’ jong u Kpa Bakhuid, ula pyniaid ia ka Mass Bakhuid ne kaba la tip kum ka “Pontifical High Mass” bad ka jingrwai iaroh, kaba la pynlong hynne ka Sngi U Blei ha Sacred Heart Shrine ha Tura.
Ka Pontifical High Mass kadei ka jingrakhe ia ka Eukharist ha kaba u Bishop ula sam ia ka Sacrament ba kyntang sha ki riewngeit ia kaba la pynlong ha ka rukom jong ka balang Catholic kaba long kaba shongkun bad kaba don burom bha.
Ha kane ka jingrakhe la wan ban iashimbynta da u Bishop Andrew R. Marak jongka Tura Diocese bad u Auxiliary Bishop u Jose Chirackal, ryngkat bad ki Lyngdoh Niam, ki Parish Priest bad kiwei kiwei.
U Myntri Rangbah ka jylla u Conrad K. Sangma ula iashimbynta lang ha ka Mass Bakhuid ha kaba la iadonlang ruh u MLA ka Mahendraganj u Sanjay A. Sangma bad kiwei kiwei ki nongialam ka thain.
U Girelli uba dei u Apostolic Nuncio sha ka ri India bad Nepal bad u Nongrah Tiensyiem jong u Kpa Bakhuid ula wan jngoh ar sngi ia ka jylla Meghalaya.
Da ki hajar ngut ki riewngeit kila ia wan poi sha ka ïingmane ban iashimbynta ha ka Pontifical High Mass, kaba la pynkylla syndon ia kane ïingmane kaba la dap bad shlei da ki paid riewngeit. Ki riewngeit kila sngap bad shah shkor ia u Apostolic Nuncio uba la ialam ia ka jingduwai bad ia ka jingsam ia ka khubor ryngkat bad ka sam ia ki jingkyrkhu sha ki riewngeit baroh.
Ka phyllaw jong ka ïingmane kala sawa jam da ki sur jingrwai kaba la rwai da ki Choir, kaba la thaw bad pynlong ia ka jinglong jingman kaba shongkun bad ki riewngeit kila iashimbynta lang ha ka jingduwai da ka jingshit rhem ban rakhe ia ka jingialang kaba kyrpang jong ka Tura Diocese.
Ka jingwan jngoh u Apostolic Nuncio ka dei kaba la niew kum ka khyllipmat jong ka jinglehbha bad ka jingiatylli hapdeng ki riewngeit Catholic kiba don ha kane ka thain.
