Kular pyniohkam haduh 5 lak ngut ki briew ha ki san snem ban wan
Shillong, K’lyngkot 31 : Ka National People’s Party (NPP) hynne ka sngi ba-ar kala pynlong ia ka rally da ki thuk thuk ha South West Garo Hills ban pyni paidbah ia ka jingkhlain jong ka NPP bad ban pan jingkyrshan ia ki 4 ngut ki kyrtong jong ka NPP ha kane ka elekshon MLA ban long la 27 tarik Rymphang.
Kane ka rally thuk thuk ka dei kaba la ialam hi da u National President ka NPP bad Myntri Rangbah ka Jylla Conrad K Sangma ha kaba palat 1500 ngut ki nongkyrshan ka NPP na ki saw tylli ki lai tylli ki constituency ka South West Garo Hills, kila wan ban iashimbynta.
Ia kane ka rally la pynsdang na ka ktem jong u Dr Mukul Sangma-ka Ampati bad la pynkut ha Garodubi, kaba long kumba 20 km eiei ka jingjngai. Ka dei ruh ka jingpyni ia u Dr Mukul Sangma ba ka NPP ka mut shisha bad ka kloi ban iatynjuh ha kane ka ktem jong u.
U Conrad ula pyntip ruh hakhmat ki nongkyrshan kiba la ialum paidbah, ba ka Sorkar jong u kan pynthikna ia ka lad iohkam haduh 5 lak ngut ki briew hapoh kine ki san snem ban wan lyngba ki prokram bapher bapher kum ka Prime Project, kaba dei ka project jong kane ka sorkar ba mynta.
“Ka party jong ngi kala shimkhia bha na ka bynta ka bha ka miat ki samla, lyngba ki prokram kum ka Prime, ngi la lah ban pynshlur ia ka jingsengkam lajong ha Meghalaya bad ngi pynthikna ia ka lad iohkam haduh 5 lak ngut ha kine ki san snem ban wan” ong u Conrad.
U Conrad ula kular ruh iaki samla ba ka sorkar jong u kan iai bteng ban bei pisa bad kyrshan ia ki kam kiba iadei bad ki kam ialehkai, ka put ka tem nalor kiwei kiwei ki kam.
Haba kdew ia ka jingshah rem ha u snem 2018 na South West Garo Hills ha kaba baroh saw tylli ki constituency kila leit sha ka Congress bad hadien sha ka TMC, u Myntri Rangbah ula pynpaw ia ka jingbym sngewtynnad ba ki MLA ka Liang Pyrshah kim ju wan iakren bad ka sorkar jong u, kaba dei ka daw ba bun ki kam pynroi kim shym la wan ha South West Garo Hills.
“Ka long kaba kongsan ba ki MLA kin iatrei ryngkat bad ka Sorkar bad ong ba katno kan myntoi lei lada ioh ia ki MLA kiba don ha ka Liang Synshar” ula ong.
Haba ther ia ka TMC ba ialam da u Dr Mukul Sangma, u Conrad ula ong ba ka dei ka Iing kaba pait ba pra haba kam ba bun ngut ki nongkyrshan ka TMC kila ngiah bad kila phet noh sha kiwei pat ki party.
“Kiba bun na kito kiba phet na ka TMC kila wan sha ngi ha ka NPP bad iathuh ba kam don lawei satia ha kane ka party. Ha kane ka elekshon ngin sa pyni ba ka NPP kan wan phai da ka jingjop ba lah ban thaw Sorkar marwei” ong u Conrad hakhmat ki hajar ngut ki nongkyrshan kiba la risa.
Ia kane ka rally thuk thuk la pynlong kum shibynta ban pynioh jingkyrshan ia ki saw ngut ki kyrtong na ki saw tylli ki constituency ba kynthup ia u Subir Marak na Rangsakona, Sanjay A Sangma na Mahendraganj, Ian Botham K Sangma na Salmanpara bad Steve Marak in Ampatigre.
U Nongrwai ba pawnam ka Arunachal Pradesh Bage Kamsai ula wan ban rwai hakhmat ki paid nongkyrshan ka NPP ia ka jingrwai jong ka NPP.
