Jurip ia ki jingker sainar ba shah pynpra
Shillong, Nohprah 15 : U Director General of Police (DGP) ka Jylla Dr L.R Bihnoi hynne ka sngi palei, ula hiar sha West Karbi Anglong, Assam, bad iakynduh ia ki Heh Pulit ka Assam ban iamir jingmut kumno ban tehlakam ia ka jingshongsuk shongshngain jong ki paidbah ha ki shnong khappud ka Block-II.
Kane ka jinghiar u Khliehduh ka Tnad Pulit ka Jylla sha West Karbi Anglong kaba jia ruh namar ka jingshah thwet jong ki Nongialam Shnong ka shnongn Umsaw Lumdorbar, Block-II ha ki Pulit ka Assam.
Kane ka jingthwet kala mih namar ka jingshah pynpra ki jingker sainar jong ka Tnad Forest ka Assam ha kane ka Shnong, ia kaba la kynnoh da ki nongshongshnong ba ka dei ka jingkyntur pud jubor sha ki jaka jong ki paidbah.
Une u Heh Pulit ka Jylla ula iakynduh ia u Inspector General (Law & Order) ka Assam u PK Bhuyan, u DIG (Central Range) ka Assam Satyaraj Hajariki, u Deputy Commissioner ka West Karbi Anglong Krishna Barua ha ka jingiadonlang u Superintendent of Police ka Ri-Bhoi Giriprasad M, u SP ka WKA Indranil Barua bad u DFO ka Hamren R Engti bad kiwei.
Kine ki Heh Pulit kila iashong jingialang ha Beat Office ka Umjakini Forest Range kaba hap hapoh ka Baithalangso Police Station, West Karbi Anglong.
Kat kum ka khubor ba ioh, la iathuh ba kane ka jingialang kala ban jur ia ka jingdonkam ban pynneh ia ka shongsuk shong shngain ha ki jaka khappud bad ban ieh ha ki Sorkar Jylla ka Assam bad Meghalaya ba kin rai halor ki jingiakajia pud.
La iathuh ruh ba ki Pulit ka Assam kila pan ia ka jingiarap na ki Pulit ka Jylla namar ba bun ki paid Khasi ha khappud ki ju phet rieh na ki Pulit ka Assam. La ong ba ka tnad Pulit ka Jylla kala kular ban ai ia ki jingiarap kat kaba lah toi.
Ka jingialang kala rai ba ki Pulit ka Assam bad Meghalaya kin iatreilang noh ha kaban pynneh ia ka jingshongsuk ha ki shnong khappud.
Hadien kane ka jingialang, kine ki Heh Pulit kila leit ruh ban jurip ia ki jingker sainar bala shah pynpra ha ka shnong Umsaw Lumdorbar.
