Shillong, Naitung 04 : U Myntri Rangbah ka jylla Conrad K Sangma, hynne ka sngi Ba-ar ula iakynduh ia u Myntri ka Sorkar Pdeng uba khmih ia ka Ministry of Commerce & Industry u Piyush Goyal, ha Delhi ban pan jingkyrshan pisa na ka bynta ka ‘Unity Mall’ project bad ula pyntip ruh ia ka jingshimkhia ka jylla Meghalaya ban pyntreikam iaki program kiba kongsan kum ka One District One Product (ODOP) bad iaka Start-up Ecosystem.
U Myntri Rangbah ula aiti ruh da ka jingthoh sha u Myntri ka sorkar pdeng ha kaba iadei bad katei ka bynta.
Ha katei ka shithi u Myntri Rangbah ula pynpaw ia ki jingthmu ka sorkar jylla ban pyntreikam iaki program kiba kongsan kum ka District One Product (ODOP) bad ka jingthaw iaka start-up ecosystem bad ula ban jur ruh ia ka jingkongsan jong ka Unity Mall project, kaba iahap bad ka jingangnud jong u Myntri Rangbahduh ka ri ban kyntiew iaka jingiatylli bad jingiajan bad ban kyrshan iaka jingthmu jong ka “Make in India” bad ban plie lad iaka jingpyntreikam ia ka jingthmu jongka ODOP.
Ka Detailed Project Report (DPR) na ka bynta kane ka project la dep ban aiti sha ka Ministry ha ka 30 tarik u Jylliew 2023.
“Ka Unity Mall project ka long kaba don nongrim bha iaka Meghalaya namar ka hap bha bad ka jingangnud ban kyntiew ia ki mar ki mata kiba la pynmih da ki trai jylla, ban kyntiew iaka kam jngohkai bad ban kyntiew ia ka ioh ka kot” la pynpaw u Conrad Sangma.
Called on Hon’ble Minister @PiyushGoyal ji and apprised him on the initiative taken by the State to implement key programs like One District One Product (ODOP) in its endeavour to build a startup ecosystem.
Also sought support from the Ministry for building an iconic Unity Mall… pic.twitter.com/nQq7usq2t2
— Conrad K Sangma (@SangmaConrad) July 4, 2023
Ula pyntip ba ka jingtyrwa ban tei ia ka Unity Mall kan dei ha New Shillong Township/City, hajan jongka Administrative City kaba thymmai, business district bad ka Regional Tourism & Hospitality Hub kaba ka jingbei tyngka kan kot sha ka T.3000 klur na ka bynta kitei ki jingtei baroh.
Ka Unity Mall project ka dei kaba la pyntreikam da ka Ministry of Commerce & Industry lyngba ka Part-VI Scheme jong ka Special Assistance to States for Capital Investment 2023-24.
U Myntri Rangbah ula pyntip ba ka pisa na ka bynta katei ka project kadei kaba la pynioh lyngba ki Externally Aided Project bad ka jylla ka dang wad iaki lad ki lynti bad ia ka kabu ban ioh shuh shuh ia ka jingjyrshan pisa bad ka sorkar jylla kala dep ban shim haduh 1700 akar ka jaka na ka bynta ban tei iaka New Shillong City bad ki jaka pule kum ka IIM Shillong bad NIFT kila treikam lypa ha katei ka jaka.
Ka jaka kumba 17 akar la mang na ka bynta ban tei ia ka Unity Mall bad la pynwandur ba kan dei ka jingbei tyngka kaba kongsan ha ka New Shillong city.
U Myntri Rangbah ula kyntu ia u Myntri ka sorkar pdeng ban ai jingkyrshan ia ka bhah tyngka lyngba ka Ministry ban tei iaka Unity Mall project.
“Ban pynurlong ia ka jingangnud ban tei ia ka Unity Mall, ka jylla Meghalaya kan donkam ia ka jingkyrshan ha ka jingbei tyngka kaba heh na ka Ministry. Ka jinglut jingsep ban tei ia ka project kat kum ka DPR ka long T. 431 klur bad ka jingbhah sha ka jylla katkum ka Order jongka Ministry – F.No. 44 (1)/PF-S/2023-24 (CAPEX)(Pt.) Ka long T. 132 Klur. Nga kyntu ia phi ban kyntiew ia ka jingbhah tyngka ia ka jylla khnang ba yn lah ban pyntreikam ia kane ka projek kaba phylla” la kyntu u Myntri Rangbah.
 bad iaka Start-up Ecosystem.){kind=link}