Shillong, Nohprah 18 : U Myntri Rangbah ka Jylla Conrad K Sangma bala syran lang da u Symbud Myntri Rangbah ba khmih ia ka kam pohiing Bah Prestone Tynsong, kila iakynduh ia u Myntri kam Pohiing ka Ri Amit Shah ha Delhi, bad kyrpad ia ka Sorkar Pdeng ba kan mynjur noh ha kaban pyntreikam ia ka Inner Line Permit (ILP) ha Meghalaya.
Kine ki Nongialam na Jylla, kila pynpaw hakhmat u Amit Shah ba ka jingpyntreikam ia ka ILP ka dei ka jingangnud kaba la slem jong u paidbah bad kala iaid hynriew snem ka jingap ia ka Sorkar Pdeng naduh ba ka Jylla, kala mynjur ia ka resolution hapoh ka Iingdorbar Thaw Ain ban pyntreikam ia ka ILP.
“Ngi la iakynduh ia u Amit Shah ha ka 14 tarik Nohprah ha Delhi bad ngi la iakren sani bha halor ka jingdawa pyntreikam ia ka ILP” ong u Bah Prestone Tynsong haba iakren bad u nongai khubor.
U pyntip ba ha kane ka jingiakynduh la iakren ruh halor ka jingai jingmynjur ban pynrung ia ka ktien Khasi bad Garo ha ka khyrnit ba phra ka riti synshar kari, ban ain oh iala ka jong ka Civil Service Cadre ia ka Meghalaya bad ka Foreigners & Immigration Act, 2025.
U Bah Prestone ula ong ba ka Foreigners & Immigration Act ka dei kaba kongsan bha ha Jylla khamtam haba sakhi ia ki jinglong jingman ha ri Bangladesh. “Ka jingiadei hapdeng ka ri India bad ka Bangladesh kam long kaba itynnad bad ngi hap ban shimkhia bha ia ki lad jingada khnang ban lah khang ia ka jingwan rung tuh ki mynder ri, la ki de kiba wan lyngba ka Assam ne na kylleng sawdong ki khappud” ula ong.
Halor ka ILP, u Bah Prestone u pyntip ba u Amit Shah ula iathuh ba ka Ministry of Home Affairs (MHA) ka dang khmih bniah ia kane ka kam bad kumjuh ruh ia ka jingpynrung ia ka ktien Khasi bad Garo ha ka khyrnit kaba phra.
“U Amit Shah ula pyntip ba ka MHA ka dang khmih bniah ia ka jingdawa ILP bad pynpaw ba ha ka por kaba biang, ngin sa pyntip sha phi ia ka jinglah pyntreikam ia ka” iathuh u Bah Prestone haba pyntip ba ka Sorkar ka khlem shongthait ban buddien ia ka jingdawa ILP bad ka Ktien Khasi bad Garo naduh ba ka Iingdorbar Thaw Ain kala ai jingmynjur ia ka resolution.
“Ngi don jingkyrmen ba ha kawei ka sngi, ka Sorkar Pdeng ban sa pynmih ia ka ‘Draft’ ka ban pynthikna ba ki nongshong shnong ka Meghalaya kin long kiba shngain bad yn ym don mano manor uh ki ban ioh rung ne sah hapoh ka Jylla khlem da shah khmih bniah shuwa” ula bynrap.
Haba kylli ia ka jingbym kren shai ka Sorkar Pdeng la kan ai ne ym ai ia ka ILP, u Bah Prestone ula ong “Kaba ngi hi, ngi iakren ka long tang katne, sngewbha burom lem ia ka jingangnud jong ki paidbah ka Meghalaya”.
U Bah Prestone ula pynpaw ia ka jingsngewtynnad ba tang hadien ba dep iakynduh ka Sorkar Jylla ia u Amit shah, u MP ka Lok Sabha na Shillong Dr Ricky Syngkon, ula leit iakynduh ia Amit Shah ban dawa ILP.
 ha Meghalaya.){kind=link}