Nongpoh, 27 Iaiong: Ka kynhun ki Nongri sniang ba la tip kum ka Meghalaya Pig Farmer Association, hynnin ka sngi Ba-ar, kala leit ban ai dorkhas sha u Myntri ka Tnad Animal Husbandry Bah A.L Hek ba pynsngew halor ka jingeh ba kum ki Nongri sniang ha ka jylla ki ju kynduh na ka por sha ka por.
Nalor ka Dorkhas, ka kynhun, ka la pynpaw hakhmat u Bah A.L Hek, ba ki kwah eh ban kyntiew ia ka kam ri sniang ha Ri Lum Khasi Jaintia, namar ki don ruh ia ka jingthmu ban pynkylla ia ka rukom ri sniang katkum kane ka juk bad ka ban pynmyntoi ia kito ki briew kiba im ha ka kam ri sniang.
Ka kynhun kala kyntu ia u Myntri sorkar ba u dei ban pynsangeh ne pynduna noh ia ka jingwanrah sniang nabar sha ki Iew ki Hat, namar ym tang ba ki wanrah ia ka jingsaphriang jong ka jingpang African Swine Fever (ASF), hynrei ka pynduhnong ruh ia ki Nongri sniang hapoh ka jylla.
Pule lang ia kane: Pyntip u DyCM : “Ka Sorkar kan iakren tang ia ka Roster System ym ia ka Reservation Policy”
Ki la pynpaw ruh ba ka kynhun ka kwah ban ioh ia ka jingiarap na ka sorkar haba iadei bad ka jaka ban pynlong kum ka Iew iadie iathied beit tang ia ki sniang kiba dei na ka jylla, da kaba pynpaw ruh ba ka dei ban don ha Ri Bhoi kumjuh ruh ha baroh ki Distrik kiba don ha ri lum Khasi bad Jaintia.
Nalor kane, ka kynhun kala kyntu ruh ba ka sorkar ka dei ban ithuh noh ia ka Meghalaya Pig Farmer Association, ba kan dei kum kawei na ki kynhun Nongri sniang ba kan lah ai jingiarap ia kiwei pat ki Nongri sniang ha ka jylla. Kala pynsngew ruh halor ka jingbym don jaka khmih bniah ia ki sniang bad ruh ka jingbym lah pynbiang dawai sniang hapoh ka tnat Veterinary.
La pyntip ba u Bah A.L Hek, u la ai ka jingkular ba un trei shitom ha ka ban iarap ia katei ka kynhun khnang ban kiew ka kam ri sniang ha ka jylla bad ba kan long kum kawei na ki lad iohkam iohjam.
Pule lang ia kane: Assam: Pynlong jingiakhih ka AASU halor ka jingkiew dor ki mar ki mata
