Shillong, Naitung 28: Da ka jingthmu ban iada bad pynneh pynsah ia ki hati bad ban shim ia ki lad ki lynti ban lait na ka jingpynthud ki hati ia ki briew ha ka thain khappud jong ka Assam-Meghalaya, ka tnad Forest kala pynlong ia ka jingialang hapdeng ki heh ophisar ka tnad Wildlife ka Goalpara-Assam bad ki heh jongka East bad West Garo Hills Wildlife Division, Tura.
Ha katei ka jingialang la wan ban iashimbynta da u S.N. Sangma, IFS, CF, Garo Hills Region, Tejas Mariswamy, IFS, DFO, Goalpara, Rupanker K. Marak, MFS, DFO, Tura, Bibhuti and Aaranyak ryngkat bad ki Range Officers jongka Garo Hills Wildlife Division.
Ha kane ka jingialang ki heh ophisar kila ia mynjur ban iatreilang ha kaba iadei bad ka jingiatyngkhuh hapdeng ki hati bad ki briew, ki khlaw kiba ki hati ki shong ki sah bad ban plie lad da ka ba suk ia ki hati ba kin iaid ha kine ki ar tylli ki jylla.
Kane ka jingialang kala rai ruh ban thaw da ka WhatsApp Group ban sam ia ki jingtip halor ka iaid ka ieng jong ki hati khnang ba kan don ka jingiatreilang kaba buang. Ha ka sien kaba nyngkong, kine ki Ar tylli ki Division kila rai ruh ban rakhe lang iaka World Elephant Day ha ka 12 tarik u Nailar ha ka thaiñ khappud jongka Assam-Meghalaya.
Kine ki heh jong ka tnad Wildlife kila rai ruh ialehkai haka jingialehkai paralok ha ka Football hapdeng ka Goalpara bad Tura ha ka taiew ba khatduh jong u Nailar ha Tura.
