Shillong Nailar 22: Ka Sorkar Assam bad ka Sorkar Meghalaya, mynta ka sngi Saitjain kin ia shong jingialang ban iakren ha kaba iadei bad ka jingeh kaba la mih na ka jingkhang ia ka leit ka wan jong ki kali Meghalaya bad Assam.
Katkum ki khubor kiba la iohlum, la iathuh ba ia katei ka jingialang yn pynlong ha State Guest House, Koinadhora, Guwahati.
Ia ka Sorkar Meghalaya yn ialam da u Symbud Myntri Rangbah ka Jylla u Bah Sniawbhalang Dhar, ha kaba yn donlang ki heh ophisar na ka tnad Transport bad ki nongialam jong ki nongniah kali Tourist.
Katba ia ka Sorkar Assam yn mihkhmat da u Myntri Sorkar uba khmih ia ka Border Protection u Atul Bora, ki heh ophisar sorkar ba ki nongialam jong ki kynhun ka Tourist Association ka Assam.
Ka jingthmu jong kane ka jingialang ka long ban iakren pynbeit ban don noh ia ka jingiatreilang bad ka jingiasngewthuh jingmut bad ban weng noh ia kano kano ka jingkhang pyrshah ia ka leit ka wan jongki kali bad ki kali Tourist hapdeng ka jylla Assam bad Meghalaya, khamtam haba kane ka jingiakhang ia ki kali ban leit ban wan kala ktah jur ia ki paitbah nongleit nongwan.
Lah ban ong, ba kane ka jingiakren kadei ruh kaba la mih na ka jingiakren hapdeng u Myntri Rangbah ka Jylla u Conrad K Sangma bad u Myntri Rangbah ka Assam u Himanta Biswa Sarma ban wanrah biang ia ka jingiadei kaba iajan hapdeng kine ki artylli ki jylla.
