Shillong Kyllalyngkot 22: Ki shipai Border Security Force (BSF) ka ri India bad ki shipai Border Guard Bangladesh (BGB) ka ri Bangladesh, hynne ka sngi, kila iashimbynta ha ka jingialang jong ka Sector Commander Level Co-ordination Meeting kaba la long ha ka thaiñ khappud jongka 193Bn BSF.
Ka BSF kala pyntip ba ka jingthmu jong kane ka jingïalang ka long ban pynkhlain ia ka jingiadei hapdeng kine ki artylli ki ri bad ban don ia ka jingiatreilang kaba janai.
Ia ka kynhun jong ka BSF la ïalam da u Manoj Kumar Barnwal uba long u DIG, Sector HQ BSF Shillong katba ia ka kynhun jong ka BGB la ïalam da u Md. Saiful Islam Chowdhury uba long u Deputy Director General, Sector Commander BGB, Sylhet, Bangladesh.
Ki heh shipai ka BSF bad BGB kila ïatai sani halor ki mat kiba ktah ia ki thain khappud kum ka Co-ordinated Border Management Plan bad kiwei kiwei ki mat bad kumjuh ban don ia ka jingiatreilang hapdeng ka jong ki.
Kila pynpaw ia ka jingsngewhun halor ka jingpynlong ia kane ka jingïalang kaba pyni ia ka jingdon ia ka jingiadei paralok hapdeng kine ki artylli ki ri bad ki iengskhem ban pynlong ia ka thain khappud kaba shongsuk shongshngaiñ.
Ki shipai BSF bad BGB kila shim ruh ia ka rai ban iai bteng ban pynlong ia kum kine ki jingïalang ha ki sngi ban wan, khnang ba kan don ka rukom treikam kaba janai ha ki thain khappud jong kine ki artylli ki ri.
