Shillong, Naiwieng 01: Ki Rangbah Shnong naka thain Mawlai ba kynthup naka shnong Nongkwar, Umthlong, Mawiong bad Mawiongrim, hynne ka sngi Balang, kila kynduh ia u Myntri ka tnat PHE Marcusie Marak ban iakren halor ka jingslem ban pyndep iaka skhim sam um ka Jaal Jeevan Mission (JJM) hapoh ka thain.
Ia kane ka kynhun la ialam da u MDC ka Mawlai bah Teibor Pathaw, ban buddien halor ka jingslem ban pyndep iaka skhim JJM kaba don ha Lum Mawnei ban tan iaka um naka bynta ban sam sha ki 4 tylli ki shnong ha Mawlai.
Haba kren sha ki lad pathai khubor u Bah Teibor Pathaw ula iathuh ba ia kane ka Proejck JJM la plie hi da u Myntri Rangbah ka jylla ha u snem 2022 bad naka liang ki shnong kiba don palat 3000 tylli ki longing, ki dap daka jingkmen ban ioh jingmyntoi na kane ka skhim.
U Bah Teibor ula pynsngew ba kane ka skhim ka long kaba donkam bha bad dei namar kata, ka kynhun kala wan ban buddien na u Myntri ka tnat PHE bad kyntu ia u ban bthah iaki nongpyntrei (contractor) ba kin kham pynsted iaka kam naka bynta ban pyndep kloi ia kane ka skhim.
Ula ong ba kane ka Project ka long kaba donkam bha khamtam iaka shnong Mawiong, Mawiongrim, Mawiong Umjapung, Umthlong bad Nongkhwar namar kine ki shnong kim hap haka project GSWSS III.
“Ka jingwan kynduh ia u Myntri PHE kadei hi ban buddien ia kane ka project JJM namar naka liang ki shnong ruh kila rai ban iatreilang khamtam haba iadei bad ka jingai No Objection Certificate (NOC) ban peit ha kano ka bynta, la donkam ban kham pynsted ia kane ka project bad ban pyndep haka por baka sorkar kala buh” ong u Bah Teibor.
U Bah Teibor ula iathuh ba bun ki jaka pyllang um (Tank) la pyndep bad iaka Treatment Plant ha Lum Mawnei ruh ka jingpyntrei kala iaid shaid shaid hynrei la sngewthuh ba ka jingpynslem kadei hi namar ka jingshah pynthut haki bor mariang.
Ula iathuh ba ka kynhun Rangbah Shnong kala kyntu ia u Myntri ka tnat PHE ban bthah iaki nongpyntrei ban kham pynsted iaki kam khamtam haba iadei bad ka Treatment Plant ha Lum Mawnei.
“Naka liang ka kynhun Rangbah Shnong bad nga kum u MDC ngin iai buddien ia kane ka kam ban pynthikna ba yn lah ban pyndep noh ia kane ka skhim sam um JJM hapoh u Lber 2024” ula ong.
Pule lang ia kane: Pynksan u Myntri ba sam umkhuid ka PHE ha Shillong, artatien ia ka Um ba lum nongmuna ka FKJGP
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
