Shillong, Iaiong 15: Ka Maitshaphrang Movement ha ryngkat bad ka seng Khasi Student Union (KSU), ka Federation of Khasi Jaintia and Garo People (FKJGP) bad ka Hynniewtrep National Youth Front (HNYF) kila lum iaki Kur bapher bapher ban iathir halor ka jingdawa ban pynkylla ïa ka aiñ Meghalaya Succession to Self Acquired Property Khasi and Jaintia Special Provision Act 1986 sha ka Meghalaya Equitable Succession to Self Acquired and Ancestral Property Khasi and Jaintia Special Provision Act.
Haba kren sha ki lad pathai khubor u Convener ka Maitshaphrang u bah Michael Syiem ula iathuh ba kila don kumba 7-8 tylli ki Kur kiba la wan shim bynta ha kane ka jingiathir ba kynthup ka Kur Nongrum, Marbaniang, Marwein nalor kiwei kiwei de.
U bah Micheal ula iathuh ba ha kane ka jingialang kila don ki Kur kiba ïahap jingmut ha kaba ïadei bad ka jingkynthup ïa ka ktien ‘Ancestral bad ka ktien ‘Equitable’ hynrei kila pynpaw ba kan bha eh iakren shwa ia kine ki jingai jingmut ha ka jingialang hapdeng ki Kur ki Kha.
Ula ong ba ki nongïalam jong kitei ki Kur ki la pynpaw ba ong ba kaba donkam ka long ban rah ïa katei sha ka jingïalang jong ki Kur jong ki ban ïoh ïa ka jingkyrshan.
Pule lang ia kane: Dawa ki Garo ban mynjur iaka Resolution ha Iingdorbar ban phiah noh ia ka Megahalaya
“Ki kur kiba wan mynta ka sngi ki kyrshan ïa kane ka jingthmu jong ka Maitshaphrang ban dawa pynkylla ïa ka aiñ Meghalaya Succession to Self Acquired Property Khasi and Jaintia Special Provision Act 1986 sha ka Meghalaya Equitable Succession to Self Acquired and Ancestral Property Khasi and Jaintia Special Provision Act hynrei nangne shakhmat kin pynlong la ki jong ki jong ki jingïalang Kur ha kaba ha ka jingïalang kaba ngin khot biang sa shisien pat kin wan kham bun” la ong u bah Michael.
U bah Micheal ula ong ba ka jingwanrah ka jingkylla ha katei ka aiñ ka long ba ha katei ka aiñ, yn buh lang ïa ka ktien ‘Ancestral’ bad ïa ka ktien ‘Equitable’ ha katei ka aiñ khnang ba ka jingïa ai bynta lem da kaba pynkam kan long ïa ki khun shynrang bad ki khun kynthei lyngba ka pynkam ha kaba ïadei bad ka Self Acquired bad ka Ancestral Property.
